Azərbaycan 3 ölkə ilə vahid gömrük prosedurlarının tətbiqinə başlayacaq

05.06.2016 16:51     Ecoreaksiya     1327

Müvafiq açıqlamanı TDƏŞ baş katibi Ramil Həsənov edib.

Türkdilli Dövlətlərin Əməkdaşlıq Şurasına ( TDƏŞ ) üzv dövlətlər (Azərbaycan, Qazaxıstan, Türkiyə və Qırğızıstan) vahid gömrük prosedurları və standartların tətbiqinə dair protokollar imzalayacaqlar.

ANS PRESS-in məlumatına görə, bu barədə Trend-ə açıqlamasında TDƏŞ baş katibi Ramil Həsənov məlumat verib.

Onun sözlərinə görə, bu, Şuranın bütün ölkələrinə gömrük strukturlarını birləşdirməyə, eləcə də tranzit yüklərin daşınması üçün sadələşdirilmiş və şəffaf gömrük prosedurları tətbiq etməyə imkan yaradacaq.

R. Həsənov bildirib ki, hazırda protokollar hazırlanma mərhələsindədir.

"Hazırda işçi qrup üzvləri ilə danışıqlar aparılır və tərəflər ilkin razılıq əldə ediblər. Mən ümid edirəm ki, bu protokollar gələcəkdə tətbiq olunacaq və bizim ölkələrin gömrük strukturları birləşdiriləcək. Hesab edirəm ki, yaxın bir neçə ay ərzində biz şuraya üzv ölkələrinin protokolları imzalayacağına şahidlik edəcəyik" - deyə Həsənov əlavə edib. 

Türkdilli Dövlətlərin Əməkdaşlıq Şurası — müasir türkdilli ölkələrdən ibarət beynəlxalq təşkilatdır. Təşkilatın əsas məqsədi şuraya üzv ölkələr arasında hərtərəfli əməkdaşlığın inkişafıdır. Şura 2009-cu ildə Naxçıvanda yaradılıb. Şuranın üzvlərini Azərbaycan, Türkmənistan, Qazaxıstan, Türkiyə və Qırğızıstan təşkil edir.