“SOCAR Polymer”in mühəndisi: “Polipropilen zavodunda saatda 23 ton məhsul istehsal olunacaq”

24.07.2018 13:13     Ecoreaksiya     1038

 Xəbər verildiyi kimi, iyulun 18-də Azərbaycan Prezidenti Ilham Əliyev və İtaliya Prezidenti Sercio Mattarellanın iştirakı ilə Sumqayıt Kimya Sənaye Parkının ərazisində “SOCAR Polymer” layihəsi çərçivəsində inşa edilən Polipropilen Zavodunun açılışı olub.

Polipropilen məhsulunun istehsal prosesi, məhsulun necə əldə olunması barədə “SOCAR Polymer” şirkətinin proses mühəndisi Rövşən Sadıqovla söhbət etdik.

Şirkətin proses mühəndisi "Report"a “SOCAR Polymer”in Polipropilen zavodunda istehsal gücünün minimum 80%, maksimum 100% işləmə rejimindən asılı olaraq ayda 13-16 min ton polimer istehsalı nəzərdə tutulduğunu bildirib.

Proses mühəndisi istismara verilmə ilə ilk aylar ərzində saatda 23 ton istehsal üçün tam gücdə çalışacaqlarını bildirib.

O məlumat verib ki, zavod 23-25 ton/saat məhsuldarlığa malikdir və gündəlik 500 ton polipropilen istehsalı planlaşdırılır.

Şirkət nümayəndəsi bildirib ki, zavodda istifadə sahəsinə görə bir-birindən fərqlənən 3 növ polipropilen (Homopolimer, random polimer və so-polimer) məhsulu istehsal olunacaq: “Homopolimerlər daha çox yüngül sənayedə, gündəlik məişətdə istifadə edilən plastik qabların istehsalında, Random polimerlər tibb sənayesində istifadə olunan avadanlıqlar, torbalar, bəzi şprislərin istehsalında, So-polimerlər daha yüksək özüllüyə, sıxlığa, möhkəmliyə malik avtomobil və digər sənayedə istifadə olunur”.

R.Sadıqov zavod üçün Azərbaycan Dövlət Neft Şirkətinin (SOCAR) “Azərikimya” İstehsalat Birliyindən may ayından xammal olaraq propilen qazı alınmağa başlanıldığını və sınaq üçün istifadə olunduğunu bildirib: “May ayından “Azərikimya”dan propilen xammalı alınıb. İlkin alınan xammal zavodun ümumi start rejiminə çatması üçün istifadə olunub. Son iki aydır ki, “Azərikimya”dan gündəlik müəyyən miqdarda propilen alınır və zavodda o propilen dövr edilir. Zavod tam gücü ilə işlədikdə xammal kimi “Azərikimya” İB-dən saatda 23 ton propilen alınacaq. Zavodun gündəlik 500 tondan çox propilen tələbatı olacaq. Bunun müqabilində 500 tona yaxın polimer istehsal olunacaq”.

Qeyd edək ki, polipropilen istehsalı üçün xammal ilkin təmizləmədən keçdikdən sonra reaktora daxil olur, burada müvafiq katalizatorlar əlavə olunaraq 1 saatdan sonra polimer məhlulu alınır.

Reaksiya.az