Sahibə Qafarova: “Ermənistan öz öhdəliklərini pozmaqdan əl çəkməlidir”

14.12.2021 12:43     Siyasi reaksiya     380

Spiker Sahibə Qafarova parlamentin bu gün keçirilən plenar iclasında çıxış edərək Milli Məclisin nümayəndə heyətinin dekabrın 8-dən 10-dək Türkiyənin İstanbul şəhərinə işgüzar səfəri barədə məlumat verib.

Musavat.com-un xəbərinə görə, o, bildirib ki, səfərin məramı İslam Əməkdaşlığı Təşkilatı Parlament İttifaqının 16-cı konfransında iştirak etmək idi: “Qeyd edim ki, Türkiyə Böyük Millət Məclisinin ev sahibliyi etdiyi tədbir “Paylaşım, vicdan və İslam: Fələstin, miqrasiya və Əfqanıstan" mövzusuna həsr olunmuşdu. Dekabrın 10-da Türkiyə Respublikasının Prezidenti cənab Rəcəb Tayyib Ərdoğanın da iştirak etdiyi konfransın açılış mərasimi Türkiyə Böyük Millət Məclisinin sədri cənab Mustafa Şentopun çıxışı ilə başlandı və türkiyəli həmkarım bir daha Azərbaycanı Vətən müharibəsində qazandığı Qələbə münasibətilə təbrik etdi”.

S.Qafarova bildirib ki, toplantıda parlament sədrlərinin çıxışları olub: “Öz çıxışımda mən Azərbaycanın İslam dövlətləri ilə ikitərəfli və çoxtərəfli əməkdaşlığı inkişaf etdirmək, İslam həmrəyliyinin güclənməsinə kömək göstərmək, beynəlxalq təşkilatlarda müsəlman ölkələrini dəstəkləmək üçün həyata keçirdiyi tədbirlərdən danışdım. Müasir dünyada İslamofobiyanın ən ciddi təhlükələrdən biri olduğunu diqqətə çatdırdım. İslam dünyasının qarşısında dayanan problemlərin öhdəsindən gəlmək üçün daha güclü həmrəyliyə, dialoqa və əməkdaşlığa ehtiyac olduğunu qeyd etdim. Fələstin-İsrail münaqişəsinin həll edilməsi yolu, Əfqanıstanda sülh və sabitlik yaradılması barədə dövlətimizin mövqeyini ifadə etdim. Miqrasiya, qaçqınlar problemlərinə toxundum. Qeyd etdim ki, beynəlxalq ictimaiyyət miqrasiya probleminə son qoymaq üçün onun kökündə dayanan səbəbləri aradan qaldırmalıdır”. Sədrin sözlərinə görə, çıxışında Azərbaycanın uzun illər ərzində qaçqın və məcburi köçkün problemindən əziyyət çəkdiyini xatırladıb: “Bildirdim ki, Ermənistan 30 ilə yaxın müddətdə Azərbaycan ərazisinin 20 faizini işğal altında saxlamış, etnik təmizləmə yolu ilə 1 milyondan artıq azərbaycanlını yurd-yuvasından didərgin salmışdır. İşğal dövründə Ermənistan şəhər və kəndlərimizi yer üzündən silmiş, Azərbaycanın bütün tarixi, mədəni və dini abidələrini vandalizmə məruz qoymuşdur. Müsəlmanlara qarşı tam hörmətsizliyini və nifrətini ifadə edərək, məscidlərimizi dağıtmış, təhqir etmiş, donuz və inək saxlanılan tövlə kimi istifadə etmişdir. Bu ərazilərdəki 67 məsciddən 65-i yerlə-yeksan edilmiş, qalan 2 məscidə isə ciddi ziyan vurulmuşdur. Hətta bu ərazilərdəki qəbiristanlarımız da vandalizmə məruz qalmışdır. Qeyd etdim ki, Ermənistanın hərbi təxribatları nəticəsində başlanan 44 günlük müharibə Azərbaycanın tam qələbəsi və Ermənistanın təslim aktını imzalaması ilə nəticələnmişdir. Azərbaycan BMT Təhlükəsizlik Şurasının məlum qətnamələrini özü icra etmiş, beynəlxalq hüquq normalarını və prinsiplərini həyata keçirərək, ərazi bütövlüyünü və tarixi ədaləti bərpa etmişdir. Çıxışımın sonunda diqqətə çatdırdım ki, Azərbaycan artıq işğaldan azad edilmiş ərazilərdə genişmiqyaslı bərpa proqramlarına başlamışdır. Bu isə 1 milyondan çox vətəndaşımızın öz evlərinə qayıtmasına imkan verəcək. Ermənistanla Azərbaycan arasında suverenliyin və ərazi bütövlüyünün qarşılıqlı tanınması əsasında sülh sazişinin imzalanması, həmçinin sərhədlərin delimitasiyası və demarkasiyası regionda münasibətlərin normallaşmasınavə kommunikasiyaların bərpasına gətirib çıxaracaq. Lakin Ermənistan öz öhdəliklərini pozmaqdan əl çəkməli, vəziyyəti gərginləşdirən, regionda sülh və sabitlik perspektivlərinə ziyan vuran hərəkətlərə yol verməməlidir”.

S.Qafarovanın sözlərinə görə, İstanbula səfər çərçivəsində Türkiyə Böyük Millət Məclisinin sədri cənab Mustafa Şentopla görüş də keçirilib: “Azərbaycanın Vətən müharibəsində Zəfəri, işğaldan azad olunan ərazilərinin bərpası və yenidən qurulması, Zəngəzur dəhlizinin açılması, bunun bölgədə yeni imkanlar yaradacağı, bütün türk dövlətlərinə müsbət təsir göstərəcəyi, COVID-19 pandemiyasına qarşı qlobal mübarizə və digər məsələlər barəsində ətraflı müzakirələr aparıldı. Qeyd olundu ki, İslam Əməkdaşlığı Təşkilatının Parlament İttifaqına Türkiyə tərəfinin sədrliyi təşkilatın fəaliyyətinə yeni stimul verəcəkdir. Hesab edirəm ki, İstanbul səfəri uğurlu oldu və mən nümayəndə heyətimizin üzvlərinə öz dərin minnətdarlığımı bildirirəm”.

Reaksiya.az

Şərhlər