İnsanların evlərini söküb, əvəzində az pul verirlər

09.07.2021 12:03     Sosreaksiya     353

Mən burada vacib bir məsələyə diqqət çəkmək istərdim. Söhbət sakinlərdən dövlət ehtiyacları üçün torpaqların alınmasından gedir. Bununla bağlı Bakıda çoxlu mübahisə və münaqişələr yaranır. Deputat seçildiyim Xətai rayonunda da belə problem yaşanmaqdadır.

Reaksiya.az xəbər verir ki, bu fikirləri Milli Məclisin bu gün keçirilən plenar iclasında BAXCP sədri, millət vəkili Qüdrət Həsənqiliyev səsləndirib.

O deyib ki, Xətai rayonun 14 sakini ona müraciət edib:

“Məndən əvvəl bu insanlar müvafiq dövlət qurumlarına da müraciət edib. Mən də onların şikayətlərini müvafiq dövlət qurumlarına göndərmişəm. Lakin təəssüflər olsun ki, problem həllini tapmır”.

Q.Həsənquliyev bildirib ki, ona müraciət edən 14 sakinlə bağlı qanunun tələbləri yerinə yetirilmir:

“Məsələn, onlara deyilir ki, qonaq və yataq otağının kvadratmetrinə görə min, mətbəxt, dəhlizə görə 750 manat ödəniləcək. Təəssüflər olsun ki, müstəqil ekspertlər də qiymətləndirmə üçün dəvət olunmurlar. Sakinlərin özlərindən xəbərsiz “Kapital Bank”da hesab açaraq ora pul köçürüblər. Məcburi qaydada, müqavilə bağlamadan evlər sökülüb. Hesab edirəm ki, bu sahədə olan qaydasızlıq nəhayət düzəldilməlidir. Cənab Prezident də demişdi ki, heç olmasa insanlara 1500 manatdan ödəniş edilməlidir. Təklif edirəm ki, hər birimiz özümüzü bu insanların yerinə qoyaq. Ümid edirəm ki, sizin də dəstəyinizlə bu problem həllini tapacaq”.

Reaksiya.az

Şərhlər