Əli Məsimli: “Qadınların pensiya yaşının 65-ə çatdırılması dayandırılmalıdır”
17.11.2021 13:47 Sosreaksiya 281
Deputat, Milli Məclisin İqtisadi siyasət, sənaye və sahibkarlıq komitəsinin sədr müavini Əli Məsimli parlamentdəki büdcə müzakirələrində əhalinin aztəminatlı ailəsinin problemlərinə hökumətin diqqətini çəkməyə çalışdı.
O, Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun 2022-ci il büdcəsi haqqında qanun layihəsinin birinci oxunuşda bunları söylədi: “Vətən müharibəsində iştirak etmiş və sağlamlığını itirmiş şəxslərə - qazilərə hələ də müavinət təyin edilməyib”.
Bundan başqa, Ə.Məsimli qeyd etdi ki, bu gün Azərbaycanda ən böyük narazılıqlar pensiya və müavinətlərlə bağlıdır: “Azərbaycanda ömür uzunluğu inkişaf etmiş ölkələrdən xeyli aşağıdır, amma pensiya yaşı inkişaf etmiş ölkələrlə eyni səviyyədədir. Qadınların pensiya yaşının 65-ə çatdırılması dayandırılmalıdır. Nisbi rəqəmlərlə artımlar böyük olsa da, mütləq rəqəmlərdə bu, çox aşağıdır. Azərbaycanda pensiyaların artırılması əməkhaqqının artırılması ilə bağlıdır. İnkişaf etmiş ölkələrdə insan pensiyaya çıxanda onun ömrünün romantika dövrü başlayır. Azərbaycanda isə pensiyaya çıxan insanın məşəqqət dövrü başlayır. Çünki onun aldığı pensiya minimum tələbatının ödənilməsinə kömək etmir. Bu istiqamətdə ciddi araşdırmaların aparılması çox vacibdir”.
Ə.Məsimli əhalinin aztəminatlı təbəqəsini narahat edən bu problemlərə həsssas yanaşmağa çağırış etdi.
Şərhlər