Azərbaycandan möhtəşəm addım: ermənilərə təklif verildi
26.11.2021 14:15 Sosreaksiya 238
SOCAR-ın Gorus-Qafan yolunda yanacaqdoldurma məntəqəsi tikdiyini əks etdirən görüntülər yayıldı.
Tam bir ay bundan öncə erməni mediası Gorus-Qafan yolunun Azərbaycandan keçən hissəsində SOCAR-ın yanacaqdoldurma məntəqəsi tikməyə hazırlaşdığı haqda məlumat yaymışdı. Bu gün yayılan görüntülərdən bəlli olur ki, artıq yanacaqdoldurma məntəqəsinin tikintisi başa çatmaq üzrədir.
Əgər bu yoldan Azərbaycan maşınları keçməyəcəksə, Ermənistan isə alternativ yol çəkirsə, bu yanacaqdoldurma məntəqəsi niyə açılır?
Erməni mediası bu məntəqənin İran maşınlarına xidmət edəcəyi haqda məlumat yaymışdı. Ancaq bu məntəqənin daha strateji layihə olduğu göz qabağındadır.
Gorus-Qafan yoluna alternativ yol ensizdir, eyni zamanda sıldırım dərə yarğanlarından, dağ döşündən keçir və xüsusilə iriqabaritli maşınlar üçün tamamilə əlverişsizdir. Hələ bu yola asfalt da döşənməyib. Amma Tatev yolu tam istifadəyə veriləndə belə bu yolun Gorus-Qafan yoluna ciddi alternativ olacağı sual altındadır.
Alternativ yol həm də məsafəni böyüdür. Xüsusilə bu ərazidə yerləşən 6 erməni kəndinin sakinləri rayon mərkəzinə əvvəl 12 km yol qət edirdilərsə, alternativ yolla 150 km-ə yaxın məsafə getməlidirlər.
Alternativ yolu “cəlbedici” edən yalnız Azərbaycan ərazisindən istifadə edərkən gömrük və tranzit rüsumunun verilməsidir. Hazırda isə Azərbaycan ermənilərə yeni fürsət tanıyır.
Ermənistanda 29 oktyabrdan Aİ-92 benzini 1,85 manata (520 dram) qalxıb, Aİ-95 isə 1,92 manatdır (540 dram). Ermənistanda dizel yanacağı isə 87 qəpiyə satılır.
Azərbaycanda Aİ-92 1 manat, “Premium” 1 manat 60 qəpik, dizel yanacağı 80 qəpiyədir.
Erməni mediasının iddiasına görə, İran maşınları üçün təhlükəli və uzaq yol əvəzinə daha təhlükəsiz, yaxın yolla bərabər, dizel yanacağının ucuzluğu cəlbediciliyi yaradılır. Sadəcə Azərbaycan gömrüyünə tranzit rüsumu ödəməklə İran maşınları yeni fürsətdən bəhrələnə bilərlər.
Ancaq bu, az ehtimal ediləndir. Çünki İran TIR-ları öz sərhədləri yaxınlığında yanacaq doldurmaqla Ermənistandakı bahalı yanacaqdan istifadə etməyə bilərlər. Ona görə də erməni mediasının guya bu yanacaq məntəqəsinin yalnız İran maşınları üçün nəzərdə tutulduğu iddiası doğru deyil.
Bu, birbaşa erməni əhaliyə ünvanlanan iqtisadi mesajdır. Ermənilərin Gorus-Qafandan istifadə ilə qazancları: təhlükəsiz, yaxın yol və ucuz benzin. Niyə istifadə olunmasın bu yoldan?
Bu möhtəşəm layihə Azərbaycanın kommunikasiyaların açılması ərəfəsində Ermənistana ilk iqtisadi nüfuzudur.
Şərhlər