ABŞ-da silah mafiası çox güclüdür

01.07.2015 07:42     A-reaksiya     2755

ABŞ-da hər üç nəfərdən biri silahlıdır. Ölkədə təkcə 2013-cü ildə 33 mindən çox adam odlu silahla qətlə yetirilib.

"Injury Prevention" jurnalında dərc olunan araşdırmaya görə, amerikalıların 29% - i ən az bir odlu silaha sahibdir. Silah sahibi şəxslərin əksəriyyəti  55 yaşdan yuxarı şəxslərdir.

Columbia Universitetinin apardığı araşdırmaya görə, təkcə 2013-cü ildə 33 min 636 nəfər odlu silahla qətlə yetirilib, 84 min 258 nəfər də yaralanıb. ABŞ-da evlərdə təxminən 300 milyon odlu silahın olduğu təxmin edilir.

Araşdırmada 18 yaşdan yuxarı 4 min Amerika vətəndaşı ilə görüşən alimlər silah sahiblərinin yarıdan çoxunun ətrafının və dostlarının üstündə odlu silah gəzdirdiyini və gündəlik həyatda istifadə etdiklərini müəyyən ediblər.

Odlu silahla həyata keçirilən insidentlərlə tez-tez gündəmə gələn ABŞ-da yeni silah qanunun qəbulu tələb edilir. Ancaq ölkədə silah lobbisi olduqca güclüdür. ABŞ prezidenti Barak Obamanın da bu istiqamətdəki cəhdləri Respublikaçıların müqavimətinə görə uğurla nəticələnməmişdi.