Ölkədaxili turizmin hazırki vəziyyəti

07.08.2015 12:39     A-reaksiya     1740

Bu ilin iyul ayında 160 min 285 nəfər Azərbaycan vətəndaşı müxtəlif məqsədlərlə Gürcüstana gedib.  2014-cü ilin eyni dövrü ilə müqayisədə bugöstərici  7,9 faiz çoxalıb. Gürcüsatana üz tutanların çoxusu məhz istirahət məqsədilə qonşu ölkəyə yollanıblar. Ümumilikdə, Gürcüstanı ziyarət edən xarici ölkə vətəndaşları sırasında Azərbaycan ikinci yerdədir. Buna səbəb isə ölkəmizdə otel qiymətlərinin  baha olmasıdır.

Azərbaycanda otel qiymətləri Gürcüstanla müqayisədə 30-50 faiz bahadır. İranla müqayisədə isə bu rəqəm 100%-dən çoxdur.  Bütün bunlar isə insanların istirahət etmək üçün xarici ölkələrə üz tutmasına səbəb olur.

Prezident İlham Əliyev Nazirlər Kabinetinin iclasında turizm sahəsində qiymətlərin yüksək olması məsələsinə xüsusi toxunaraq, otel qiymətlərinin aşağı salınması ilə bağlı tapşırıqlar verib.

Qiymətlərin aşağı salınması təbii ki,  regionlarda turizm sektorunun  inkişafına  öz müsbət təsirini göstərir.

Məsələ ilə bağlı insanların daha çox üz tutduqları rayonlardan olan  Nabranda fəaliyyət göstərən “Atlant” otelin nümayəndəsi ilə əlaqə saxladıq. Otelin əməkdaşı  Nigar Yusifova qiymətlərin aşağı salınmasından sonra daha çox insanların otelə müraciət etdiyini və ötən ilə nisbətən gələnlərin sayının artdığını bildirdi.

“Qafqaz Resort” otelinin  inzibatçısı Fərhad Fazilov isə  qiymətlərin aşağı salınmasının elə də əhəmiyyətli təsir göstərmədiyini bildirdi. Onun sözlərinə görə, otelə bu il daha çox insan müraciət edib.  Buna səbəb isə otelin həyata keçirdiyi xüsusi  endirimli kompaniyalardır. Həftə sonlarına olan statistikaya baxsaq, otel 95, hətta 100% dolu olur. Keçən il isə bu rəqəm 70-80%  olub. Bu artım vətəndaşların ölkədaxili turizmə getdikcə daha çox  üstünlük verməsinin göstəricisidir.

Bütün bunlar onu göstərir ki, qonşu ölkə Gürcüstana gedənlərin sayının artması ilə yanaşı  ölkədaxili turizmə də  maraq artıb. Otellər müştəri azlığından şikayət etmir.