Ermənistanın növbəti işğal planı və odla oynayan Paşinyan

05.04.2019 13:59     A-reaksiya     946

“Bir halda ki, bu dövlət qonşuluq siyasətinə, normal davranış məfkurəsinə zidd çıxır, deməli, o, təhlükələr istehsal etməklə məşğuldur. Buna görə də tək özü üçün yox, həm də qonşu dövlətlər, region üçün təhlükə daşıyır. Təbii ki, Azərbaycan diplomatiyası daim Ermənistanın bu yanlış siyasətini, risklər istehsal etmə davranışını dünya ictimaiyyəti qarşısında göstərir, onun iç üzünü açır”.

***

Bu sözləri Publika.az-a açıqlamasında siyasi şərhçi Tofiq Abbasov deyib.

29 martda Vyanada Azərbaycan Prezidenti İlham Əliyevlə Ermənistanın baş naziri Nikol Paşinyanın görüşündən sonra yaranan mövcud situasiyaya toxunan politoloq bildirib ki, Ermənistanın çaşqın siyasət yeritməkdən başqa çarəsi yoxdur:

 

 

***


“Aprel kampaniyası diplomatiya sahəsindəki ləngliyin, qeydə alınmış iflic vəziyyətin məntiqi nəticəsi idi. Bir halda ki, diplomatiya öz vəzifələrini yerinə yetirə bilmir və burada biz açıq-aşkar Ermənistan Respublikasının dağıdıcı yanaşmasını şahidi oluruq, burada ön xətdə vəziyyətin getdikcə gərginləşdiyini gördük. Gözlənilən o toqquşmalar da beləliklə baş verdi. Müdafiə naziri Devid Tonoyanın “yeni torpaqlar üçün yeni müharibə” açıqlaması ümumi kontekstə, ola bilsin ki, uyğundur. Lakin mahiyyət etibarilə çox cəfəng, yersiz və real vəziyyəti qətiyyən əks etdirən açıqlama deyil. Ona görə ki, ilk növbədə, qüvvələr nisbəti çoxdan dəyişilib. Digər tərəfdən, müharibə etmək hüququ Azərbaycan tərəfinə məxsusdur. Çünki Azərbaycanın mövqeyini həm də beynəlxalq hüquq gücləndirir. Bildiyiniz kimi, sərhədlərin toxunulmazlığı prinsipi gündəmdədir və dünyada xaos yaranmasın deyə, beynəlxalq ictimaiyyət, ABŞ və BMT çox çalışırlar ki, ərazi iddiaları ilə bağlı ortaya çıxan problemlər çox böyüməsin. Onlarla bağlı yeni qaynar nöqtələr peydə olmasın. Ona görə də Ermənistanın siyasi rəhbərliyi burada çaşqın siyasət nümayiş etdirir. Onların əsas problemi də budur ki, Ermənistan özünü yetkin dövlət kimi göstərmir. Əksinə, natamam dövlət kimi ifadə edir. Göstərir ki, o təhlükələr mənbəyidir. Bir halda ki, bu dövlət qonşuluq siyasətinə, normal davranış məfkurəsinə zidd çıxır, deməli, o, təhlükələr istehsal etməklə məşğuldur. Buna görə də tək özü üçün yox, həm də qonşu dövlətlər, region üçün təhlükə daşıyır. Təbii ki, Azərbaycan diplomatiyası daim Ermənistanın bu yanlış siyasətini, risklər istehsal etmə davranışını dünya ictimaiyyəti qarşısında göstərir, onun iç üzünü açır. Bununla da mesajlar verir ki, dünya hazır olmalıdır. Əgər Cənubi Qafqazda yenidən nisbi sabitlik pozularsa, onda bütün bu ağır vəziyyətin məsuliyyəti Ermənistanın üzərinə düşəcək. Elmar Məmmədyarov, ondan öncə Azərbaycan Prezidenti İlham Əliyev, ümumilikdə, Azərbaycanın siyasi elitası harda olursa-olsun, Ermənistanın problemli ölkə olduğunu diqqətə çatdırırlar. Bu, özü həm bir xəbərdarlıq, həm də dünyanı məlumatlandırmaqdır”.

Qeyd edək ki, Azərbaycanın xarici işlər naziri Elmar Məmmədyarov Brüsseldə Azərbaycan-Avropa İttifaqı Əməkdaşlıq Şurasının iclasının yekunu üzrə mətbuat konfransında Ermənistan tərəfinin Dağlıq Qarabağ münaqişəsinin nizamlanmasında yeni çətinliklər yaratdığını deyib. Ermənistan müdafiə nazirinin səsləndirdiyi “yeni ərazilər uğrunda yeni müharibə” fikrinə toxunan nazir qeyd edib ki, bu cür yanaşma çaşqınlıq yaradır.

Reaksiya.az

Şərhlər