Devid Bekhem filmə çəkildi

21.08.2015 10:37     Artreaksiya     2466

İngiltərənin “Mançester Yunayted” klubunun keçmiş futbolçusu Devid Bekhem “Cinayətkarlar” adlı qısametrajlı filmə çəkilib. İdmançı ilə birgə ekran işində aktyorlar Harvi Keytel və Keti Moriarti yer alıb.

Reaksiya.az xəbər verir ki, bu barədə məlumat “Vogue” jurnalında yer alıb.

Çəkilişlər İngiltərənin “Belstaff” brendinin futbolçu ilə bağladığı müqavilə əsasında həyata keçirilib. Lentin icraçı direktoru aktrisa Liv Tayler, rejissoru Ceremi Casper olub.

Filmin süjeti Meksikada cərəyan edir. D.Bekhemin qəhrəmanı bir vaxtlar sevdiyi sirk aktrisasının axtarışına yollanan baykerdir. Sevgili rolunda amerikalı aktrisa Ketrin Uoterston çəkilib.

Filmin premyerası sentyabrda Londonda moda həftəsi zamanı keçiriləcək.

Xatırladaq ki, “Belstaff” 1924-cü ildə Böyük Britaniyada təsis olunan paltar brendidir. Şirkət su keçirməyən jaketlərin istehsalında ixtisaslaşıb. “Belstaff” həmçinin “Roma” futbol klubunun əsas sponsorlarından biridir.