Medvedev: Cavab tədbirlərinin artırılmasına dair tapşırıqlar verdim

Rusiyanın baş naziri Dmitri Medvedev Rusiyaya qarşı tətbiq edilən sanksiyaların müddətinin uzadılmasına dair G7 ölkələrinin qərarına münasibət bildirib.

ANS PRESS-in məlumatına görə, nazir Qərbin sanksiyalarına cavab olaraq 2017-ci ilin sonuna qədər cavab tədbirlərinin artırılmasına dair tapşırıqlar verib.

"Mən 2017-ci ilin sonuna qədər cavab tədbirlərinin artırılmasına dair təkliflər hazırlamağı tapşırdım. Bu barədə prezidentə rəsmi şəkildə müraciət ediləcək və hökümətin qərarı ilə rəsmiləşdiriləcək", - deyə baş nazir bildirib.

Rusiyaya qarşı sanksiyaların müddəti uzadılır

Bu gün Böyük Britaniyanın baş naziri Devid Kemeron "Böyük yeddiliyin" Rusiyaya qarşı sanksiyalarının iyun ayında uzadılacağını bildirib. 

"Ukrayna Rusiyanın təcavüzünün qurbanıdır. Biz bu danılmaz faktı unuda bilmərik. Odur ki, Minsk razılaşması yerinə yetirilənədək Rusiyaya qarşı tətbiq edilən sanksiyalar qüvvədə qalacaq", - deyə baş nazir sammitin yekunlarını şərh edərkən bildirib.

Rusiyaya qarşı tətbiq edilən sanksiyaların müddəti 31 iyulda başa çatır. Sanksiyaların uzadılması barədə məsələləri Aİ ölkələri 28-29 iyunda müzakirə edəcək.