Moskvada bir nəfər bankda müştərilər və işçiləri girov götürüb
24.08.2016 22:41 Dünyadan reaksiya 992
Fərid Əkbərov – APA. Moskvanın mərkəzində bir nəfər bankda müştərilər və işçiləri girov götürüb.
APA-nın Moskva müxbirinin verdiyi məlumata görə, paytaxtın Bolşaya Nikitskaya küçəsində yerləşən “City Bank”-ın filialında naməlum şəxs bankdakıları girov götürərək özünü partlayacağı ilə hədələyir.
Girov götürən şəxsin boynunda naqilləri olan sarı qutu asılıb. Hazırda hüquq-mühafizə orqanlarının əməkdaşları hadisə yerindədir.
RİA Novosti-nin yaydığı məlumata görə, bank iflas olmuş iş adamı Aram Petrosyan tərəfindən girov götürülüb. 55-60 yaşlarındakı bu şəxsin iflas olmuş iş adamı olduğu və həmin bankla maliyyə probleminin olduğu qeyd olunur. Onun “Vkontakte” sosial şəbəkəsində Rusiya prezidentinə videomüraciəti də yayımlanıb.
Hadisə yerinə Rusiya daxili işlər naziri Vladimir Kolokoltsev də gəlib.
Hazırda bankın yerləşdiyi ərazi polis tərəfindən mühasirəyə alınıb. Əraziyə kənar şəxslər buraxılmır. Ehtimal olunur ki, həmin şəxs bankın müflis olmuş müştərilərindən biridir. O, girov götürdüyü şəxslərin həyatlarına heç bir təhlükə olmadığını bildirib. Qeyd edək ki, girov götürülən şəxslərdən üçü A. Petrosyan tərəfindən sərbəst buraxılıb.
Şərhlər