İŞİD problemi Moskvada müzakirə edildi

11.08.2015 17:12     Dünyadan reaksiya     1381

Moskvada Rusiya Prezidenti  Vladimir Putinin təklif etdiyi İŞİD-ə qarşı koalisiya planını Rusiya xarici işlər naziri  Sergey Lavrov və Səudiyyə Ərəbistanının xarici işlər naziri Adil Əl-Cubeyr müzakirə edib.

Putin  İŞİD-lə mübarizə planını təqdim edib.

Görüşdən sonra keçirilən mətbuat konfransında danışan Lavrov qeyd edib ki,  prezident Putinin təşəbbüsü ilə hazırlanan planla bağlı bir neçə layihə tamamlanıb, ancaq üzərində işləməyə davam etmək lazımdır.

İŞİD  və digər  terror təşkilatlarının yaratdığı təhdidə qarşı mübarizədə Səudiyyə Ərəbistanı  ilə həmrəyliyin  tərəfdarı  olduqlarını  qeyd edən Lavrov regiondakı vəziyyətin həm Moskva, həm də Səudiyyə Ərəbistanı üçün böyük  təhdid daşıdığını vurğulayıb.

Lavrov Suriya və İraqdakı  İŞİD  nüfuzunu nizamlamaq üçün regionda söz sahibi olan beynəlxalq qüvvələrə  gücləri  birləşdirməyi təklif edib.

Putinin planının mərkəzində Bağdad və Dəməşq hökümətləri ilə kürd qüvvələri dayanır.

Putin planda İŞİD-i zərərsizləşdirmək  üçün Suriya və İraq qoşunları ilə kürd qüvvələri və digər region ölkələrinin də daxil olduğu "yeni  beynəlxalq koalisiya”  yaratmağı nəzərdə tutur.

Yəni Rusiyanın planı  İŞİD əleyhinə koalisiyanın bel sümüyünə, bölgənin əsas qüvvələri olan Bağdad və Dəməşq hökümətləri  ilə Kürd qüvvələrini yerləşdirməkdir.

Əsəd məsələsində fikir ayrılığı davam edir.

Lavrov  Suriya Prezidenti Bəşər Əsədin gələcəyinə suriyalıların özünün qərar verməsinin  lazım olduğunu söyləyib. Əsəd məsələsində Səudiyyə Ərəbistanı ilə fərqli düşündüklərini qeyd edən nazir, Əsədin gələcəyinin Suriya iqtidarı ilə müxalifəti arasında təşkil ediləcək yeni görüşlərdən sonra bəlli olacağını bildirib.