Müharibə olacaqmı? - Şimali və Cənubi Koreya rəsmilərinin tarixi görüşü

23.08.2015 10:23     Dünyadan reaksiya     2675

Şimali və Cənubi Koreya arasındakı görüş Panmunjon sərhəd kəndində başlayıb.

Reaksiya.az xəbər verir ki, Cənubi Koreya görüşdən öncə Şimaldan hücum qarşısında qoşunlarının ölkəni qorumağa hazır olduğunu bildirmişdi.

Danışıqlar Cənubi Koreyanın Milli Təhlükəsizlik müşaviri Kim Kwan-jin və birləşmə naziri Honq Yong-pyo ilə Şimali Koreya Xalq Ordusunun yüksək səviyyəli rəsmisi arasında aparılır.

Kim Kyou-hyun televiziyada yayımlanan açıqlamasında "Cənub və Şimal, iki ölkə arasında davam edən vəziyyətə dair Panmunjon kəndində danışıqlar aparmağı qəbul edib" sözlərini deyib.

Kim görüş təklifinin cümə günü Şimali Koreyadan gəldiyini söylədi.

Bu arada ABŞ Şərqi Asiyada ən mühüm müttəfiqlərindən olan Cənubi Koreyanı qorumağa qərarlı olduğunu bildirib. Pentaqondan edilən açıqlamada general Martin Dempseyin yüksək səviyyəli Cənubi Koreyalı rəsmilərilə telefon danışığı apardığı qeyd edilib.

Şimaldan ultimatum

Şimali Koreyalı rəsmilər şənbə günü səhər saatlarında deyib lər ki, sərhəddəki vəziyyət demək olar ki, nəzarət altındadır. Şimali Koreya Xalq Ordusu, sərhəd qoşunlarının tamamilə silahlanmış və müharibə vəziyyətində olduqlarını bildirib.

Cənubi Koreya isə Pyöngyangın Seula verdiyi "şənbə günortadan sonraya qədər Şimali Koreya əleyhinə təbliğatı dayandırın, yoxsa hərbi təcavüzə məruz qalarsınız" ultimatumunu rədd edib.

Cənubi Koreyanın Xarici İşlər Nazirliyi "Ordumuz və xalqımız, insanların seçdiyi bu sistemi qorumaq üçün bir müharibədə həyatlarını riskə atmağa hazırdır" açıqlamasını etdi.