Britaniyanın buraxdığı ballistik raket müdafiə nazirinin olduğu sualtı qayığın yanına düşüb
21.02.2024 12:30 Dünyadan reaksiya 144
![](https://img.reaksiya.az/news/2024/02/photo_36996.jpg)
Böyük Britaniyanın Hərbi Dəniz Qüvvələri yenilənmiş “HMS Vanguard” nüvə sualtı qayığından “Trident II D5” ballistik raketinin uğursuz sınaq buraxılışını həyata keçirib.
Reaksiya.az-ın "The Sun" qəzetinə istinadən verdiyi məlumata görə, raket buraxıldıqdan sonra dərhal kursundan çıxıb və göyərtəsində Böyük Britaniyanın müdafiə naziri Qrant Şepps və admiral Ben Kinin (Dəniz Qüvvələrinin rəhbəri) olduğu sualtı qayığın yanına düşüb.
Nəşrin məlumatına görə, insident ABŞ-nin Florida ştatının sahillərində Atlantik okeanında təlim missiyası zamanı baş verib. Əvvəlcə “Trident II D5”in Braziliya və Qərbi Afrika arasında, Atlantik okeanının mərkəzindəki hədəf nöqtəsini vurmaq üçün təxminən 6 min km uçacağı güman edilirdi.
Qəzetin yazdığına görə, uğursuz sınağın başvermə şəraiti ilə bağlı araşdırma başlanılıb. Bundan əlavə, Böyük Britaniya Port Canaveralda dəniz dibindən raket hissələrinin çıxarılması üçün axtarış əməliyyatına başlayıb.
Krallığın Müdafiə Nazirliyi buraxılış zamanı "anomaliyanın baş verdiyini" təsdiqləyib.
Qeyd edilib ki, "HMS Vanguard” və ekipajı sualtı qayığın geniş təmir işlərindən sonra xidmətə qayıda biləcəyini təsdiqləmək üçün tələb olunan son adi sınaq buraxılışları zamanı bütün sınaqlardan keçərək fasiləsiz dəniz maneəsini idarə etməyə tam hazır olduqlarını nümayiş etdiriblər.
Şərhlər