“Trampı zəiflətməyə çalışan ağılsız” – Konqresdə Putin barədə nələr dedilər?

31.10.2025 14:57     Dünyadan reaksiya     230

ABŞ Prezidenti Donald Trampın nüvə silahı sınaqlarını bərpa etmək qərarı Konqresdəki demokratlar və respublikaçılar arasında fikir ayrılığına səbəb olub.

Respublikaçılar Vladimir Putinin nüvə təhdidlərinə qarşı çıxdığına görə Trampı tərifləyərkən, demokratlar belə bir addımın doğruluğunu və maliyyələşdirilməsini şübhə altına alıblar.

"Bu, bizim üçün səhv olardı, çünki qazanacağımız heç nə yoxdur. Əgər biz nüvə sınağı keçirsək, sonra Çin də bunu etmək qərarına gəlsə, onlar nüvə silahlarını sınaqdan keçirməyə başlayacaqlar. Bununla da onların strateji imkanları əhəmiyyətli dərəcədə artacaq. Bizim qazanacağımız heç nə yoxdur. Bu, Çinə bir hədiyyə olardı", - Senatın Silahlı Qüvvələr Alt Komitəsinin üzvü, senator Mark Kelli (Arizona ştatından Demokrat) deyib.

Lakin respublikaçılar Trampı qətiyyətlə dəstəkləyirlər. "Bu, eskalasiya deyil", - deyə senator Ceyms Riş (Aydaho ştatından respublikaçı) bildirib. O Putini “Trampı zəiflətməyə çalışan ağılsız" adlandırıb: "Heç kim Putinin nüvə silahından istifadə edəcəyinə inanmır. Baxmayaraq ki, o, bununla bütün dövrlərdə Trampı qorxutmağa çalışıb. Düşünürəm ki, Tramp bununla "Mən bundan qorxmuram" deyir".

Nümayəndələr Palatasının spikeri Mayk Conson da Trampı dəstəkləyərək bildirib ki, bu, Amerikanın rəqiblərinə "güclü siqnalıdır".

Senator Lindsi Qrem (Cənubi Karolina ştatından respublikaçı) deyib ki, Trampın Müharibə Nazirliyinə verdiyi göstəriş Putinə cavabdır və Tramp Rusiya-Ukrayna müharibəsinə son qoymaq ümidi ilə onu danışıqlara sövq edir: "Düşünürəm ki, Putin Trampı dəyərincə qiymətləndirmir. Siz ölkəmizi təhdid edirsiniz. Peşman olacaqsınız".