Rubiodan sərt xəbərdarlıq: "Düşmənlərimizə xalça sərirlər"

29.04.2026 15:33     Dünyadan reaksiya     365

ABŞ-ın dövlət katibi Marko Rubio Kuba hakimiyyətinin Vaşinqtonun rəqiblərinə öz ərazisindən istifadə imkanı yaratması ilə bağlı kəskin bəyanatla çıxış edib.
Rubio Kuba rəhbərliyinin ABŞ-ın düşmənləri üçün "qırmızı xalça" sərdiyini və onlara Amerika milli maraqlarına zərər vuracaq fəaliyyətlər üçün şərait yaratdığını bildirib. Dövlət katibi vurğulayıb ki, xarici ölkələrin Birləşmiş Ştatlar sahillərindən cəmi 90 mil (144 km) məsafədə hərbi və ya kəşfiyyat əməliyyatları keçirməsi cavabsız qalmayacaq.

"Biz düşmən qüvvələrin bizim bir addımlığımızda cəzasızlıq mühitində fəaliyyət göstərməsinə imkan verməyəcəyik", - deyə o əlavə edib. Bu bəyanat son zamanlar Rusiya və Çinə məxsus gəmilərin, eləcə də kəşfiyyat vasitələrinin Kuba limanlarında görünməsi fonunda verilib.

Vaşinqton hesab edir ki, Havana bu cür əməkdaşlıqla regionda təhlükəsizlik balansını pozur və ABŞ-ın daxili təhlükəsizliyinə birbaşa təhdid yaradır. Rubionun sözləri həm də o deməkdir ki, ABŞ administrasiyası Kubaya qarşı sanksiyaları daha da sərtləşdirə və ya hərbi çəkindirmə tədbirlərini gücləndirə bilər. Hazırda ABŞ kəşfiyyatı adadakı xarici hərbi varlığı yaxından izləyir. musavat