Türkeşin oğlu MHP-dən çıxarıldı

Qeyd edək ki, mövcud qanunlara və parlamentdə mandat bölgüsünə əsasən baş nazirdən başqa 11 nazir postu AKP-yə, 5 post CHP-yə, MHP və HDP-yə isə hər birinə 3 mandat təklif olunmalıdır, 3 nazir postu (ədliyyə, daxili işlər və rabitə) isə müstəqil şəxslərə veriləcək. Ancaq baş nazirin kabinetdə iştirak təklifi göndərdiyi partiyalarda sözün əsl mənasında qalmaqal qopub. İlk olaraq MHP-dən İzmirdən deputat seçilmiş, partiya sədrinin müavini Kenan Tanrıkulu baş nazirin hökumətdə iştirak təklifindən imtina etməklə yanaşı, partiyadakı sədr müavini postundan istefa verib. O, addımını hakimiyyətin MHP-nin sədr müavininə vəzifə təklif etməsinə etiraz kimi əsaslandırıb. 

 

Davudoğlunun vəzifə təklif etdiyi digər MHP üzvü, deputat Meral Akşener də təklifdən imtina edib. Ancaq nazir postu təklif edilən 3-cü şəxs, MHP-nin keçmiş sədri, Türkiyə milliyyətçilərinin əfsanəvi lideri Alparslan Türkeşin oğlu Yıldırım Toğrul Türkeş Davudoğlunun hökumətdə iştirak təklifini qəbul edib. 

 

T.Türkeşin bu qərarı MHP-də şok effekti doğurub. AKP ilə koalisiya danışıqlarından imtina edən, sərt müxalifət mövqeyi nümayiş etdirən MHP-dən hökumətə əməkdaşlıq əli uzadılması partiya rəhbərliyinin sərt reaksiyasına səbəb olub. MHP sədrinin müavini postunu tutan Toğrul Türkeşin vəzifəsindən və partiyadan çıxarılması ilə bağlı qərar verilib.

 

Qeyd edək ki, Toğrul Türkeş 1997-ci ildə A.Türkeşin ölümündən sonra keçirilən seçkilərdə MHP sədri olmaq istəsə də, hazırkı MHP sədrinə uduzmuşdu. D.Baxçalı həmin vaxtdan bu günə qədər MHP sədri olmaqda davam edir. Toğrul Türkeş MHP-dən ayrılaraq Aydınlıq Partiyasını qursa da, seçkilərdə uğur qazana bilməyib və  5 ildən sonra yenidən MHP-yə qayıdıb. Ancaq ötən müddətdə Toğrul Türkeşin partiyanın sədri Dövlət Baxçalı ilə münasibətləri yaxşı olmayıb. Onun partiya qərarına zidd olaraq AKP-nin qurduğu keçici hökumətə qatılmağa razılıq verməsi ilk dəfə olaraq MHP-dən üzvlərin partiya qərarına ən yüksək səviyyədə zidd getməsi kimi tarixə düşür.

 

Toğrul Türkeşin addımı Baxçalının sərt etirazına səbəb olub. Malazgird müharibəsinin ildönümü ilə bağlı sosial şəbəkədən yaydığı mesajlarda Baxçalı üstüörtülü şəkildə Toğrul Türkeşi tənqid edib, onun addımını dəyərlərə xəyanət etməkdə ittiham edib.

 

Qeyd edək ki, hazırda CHP-nin də ümumi olaraq keçici hökumətə qatılmaq təklifindən imtina etdiyi məlumdur. Partiyanın nazir vəzifəsi təklif edilmiş bir sıra deputatları artıq mövqelərini nümayiş etdirib. Ötən gün baş nazir Davudoğlu Toğrul Türkeşə hökumətdə iştirak təklifinə müsbət cavab verdiyi üçün təşəkkür edib. Eyni zamanda Davudoğlu MHP və CHP liderlərini tənqid edib, hökumətin qurulmasına dəstək verməməkdə günahlandırıb. Onu da qeyd edək ki, əgər CHP və MHP imtina edərlərsə, hökuməti AKP və HDP, o cümlədən müstəqil namizədlərdən formalaşdıracaq. Keçici hökumət ən çoxu 3 ay hakimiyyətdə olacaq və seçkilərdən sonra istefaya gedəcək.