İŞİD Qəddafinin doğma şəhərini ələ keçirdi

11.06.2015 18:00     Dünyadan reaksiya     1613

İŞİD terror təşkilatı Liviyanın şimalındakı Sirt şəhərini ələ keçirib.

Reaksiya.Az-ın Türkiyə KİV-inə istinadən verdiyi məlumata görə, Liviyanın sabiq lideri Müəmmər Qəddafinin doğma şəhəri terrorçuların nəzarətinə keçib. İŞİD-çilər şəhərdə çəkdirdikləri fotoları sosial şəbəkədən yayımlayıblar. 

Terrorçular Liviya əsgərlərinə aid cəsədlərin görüntülərini də paylaşıblar. 

Qeyd edək ki, İŞİD may ayının sonunda paytaxt Trablusun 450 kilometr şərqindəki Sirt havalimanını ələ keçirmişdi. Sözügedən şəhər Liviyada Muammər Qəddafinin devrildiyi silahlı qiyamda ən son mübarizəni dayandıran şəhər olmuşdu. Devrilmiş lider Qəddafinin məmləkəti Sirtdə müxaliflər tərəfindən öldürülmüşdü.

Liviya dövlət başçısı Muammər Qəddafinin 2011-ci ildə devrilməsindən sonra ölkədə xaos və zorakılıq başlayıb. Ötən il İslamçı milislər paytaxt Trablusu ələ keçirərək burada öz hökumətlərini qurmuşdu.