Saakaşvilidən yeni təyinat - 26 yaşlı gömrük rəisi

17.10.2015 03:56     Dünyadan reaksiya     1814

Ukraynanın Odessa vilayətinin qubernatoru Mixail Saakaşvili 26 yaşlı bir qızı ölkənin gömrüyünə rəhbər təyin edib.

Reaksiya.az-ın məlumatına görə, 26 yaşlı Yuliya Maruşevskayanın yeni təyinatı haqqında prezident Petro Poroşenkoya da məlumat verilib. O da öz tvitter hesabında bu haqda xəbəri izləyiciləri ilə paylaşıb.

"Biz Dövlət Fiskal Xidmətinin rəhbəri Roman Nəsirovla bu haqda danışmışıq. O, bizi əmin etdi ki, bu həftə, biz oktyabrın 16-na danışmışıq, Odessa gömrüyünün yeni rəhbəri mənim təklif etdiyim namizəd təyin ediləcək. Bu, Yuliya Maruşevskayadır", - deyə Mixail Saakaşvili bildirib. 

O həmçinin bildirib ki, Maruşevskayanın komandasında ona gürcü müşavirlər kömək edəcəklər. "Onlar vaxtilə Gürcüstan gömrüyündə islahatlar aparan şəxslərdir", - deyə Odessanın gürcü qubernatoru əlavə edib.

Saakaşvilinin sözlərinə görə, Maruşevskayanın təyinatından dərhal sonra onun komandası gömrükdə kadr müsabiqəsi üçün hazırlıqlara başlayacaq. Gömrük işçiləri də məhz bu müsabiqə yolu ilə seçiləcək.