Azərbaycanlılara hörmətsizlik edən İran telekanalının məsul şəxsi istefa verdi

16.11.2015 16:05     Dünyadan reaksiya     1749

İran Teleradio Şirkətinin ("Səda" və "Sima") İkinci kanalının Uşaq verilişləri departamentinin direktoru azərbaycanlılara qarşı təhqiramiz ifadələrin səsləndiyi “Fitilə” proqramına görə başlayan etirazlardan sonra istefa verib.

Reaksiya.az Trend-ə istinadən xəbər verir ki, “Fitilə” proqramında azərbaycanlılara qarşı hörmətsizlikdən sonra Uşaq verilişləri departamentinin direktoru Əli Zarean səhvini qəbul edib və vəzifəsindən istefa verib.

Məlumatda qeyd olunur ki, onun yerinə Azərmidoxt Azərhuş təyin edilib.

Qeyd edək ki, noyabrın 6-da İran televiziyasında adıçəkilən veriliş zamanı Azərbaycan dilində istehza dolu dialoqlar səslənib ki, bu da İranda yaşayan azərbaycanlıların şikayətinə səbəb olub. Təbriz başda olmaqla İranın bir çox mərkəzi şəhərlərində kütləvi etiraz aksiyaları keçirilib. Bundan sonra rəsmi şəxslər əhalini təmkinli olmağa çağırıb, Teleradio Şirkəti və proqramın prodüseri isə əhalidən üzr istəyiblər.