Banklar vətəndaşları necə soyur? - YENİLƏNİB

07.01.2016 20:15 Ecoreaksiya 2255

Tanınmış müğənni Elnarə Xəlilova bankomatlarda əhalidən əlavə vergi tutulmasına əsəbiləşib.

"Reaksiya" big.az-a istinadən xəbər verir ki, Elnarə Xəlilova sosial şəbəkələr vasitəsilə Beynəlxalq Bank rəhbərliyinə üzünü tutaraq bu cür qərarın düzgün olmadığını vurğulayıb:

"Beynəlxalq Bank göstərdiyi xidmətlərin dəyərini 50 faiz qaldırıb. Bundan sonra bankomatdan pul çıxararkən hər 100 AZN-ə 1.60 manat tutulacaq. Məgər bankomatlar da dollarla işləyir? Ay bu cür qərar verənlər, nəzərinizə çatdırmaq istəyirəm ki, əhalinin məvacibləri hələ qaldırılmayıb, təəssüflər olsun. Bir maraqlı məqam, bir il əvvəl dolların məzənnəsi 0,78 olanda, Azərbaycan Beynəlxalq Bankı niyə hər 100 AZN-ə 78 qəpik tutmurdu? Yoxsa 10 milyardlıq oğurlanmış pulu biz qaytarmalıyıq?"

18:45

Tez-tez mətbuatda bank fırıldaqları haqda xəbərlər oxuyuruq. Bu gün isə bu hadisənin əyani şahidi olduq. Belə ki, əməkdaşımız Beynəlxalq Bank hesabından üç manat pul çıxarıb, buna görə isə əlavə 5 manat komissiya haqqı tutulub. Dəhşətlidir! Dünyanın harasında belə fantastik məbləğdə komissiya haqqı tutulur? Bu barədə xeyli araşdırdıq, amma rastımıza belə ölkə çıxmadı. Bəs niyə inkişaf etmiş ölkə olmağa iddia edən Azərbaycanda bu baş verir? Sualın cavabı üçün ilk öncə “Azercard”-a müraciət etdik. Cavabında isə bunun elə belə olmalı olduğunu bildirdilər. Mərkəzi Bankın saytında göstərilən əlaqə nömrələri ilə ünsiyyət cəhdimiz isə ümumiyyətlə alınmadı, çünki qeyd edilən nömrələr işləmirdi. Heç saytın “Müraciət” bölməsi də köməyimizə çatmadı.

Bildiyiniz kimi bu gün ölkəmizdə iqtisadi durum müəyyən dərəcədə qarışıqdır. Banklar isə bu qarışıqlıqdan maksimum yararlanaraq əhalini soymaqla məşğuldur. Biz isə şikayətimizi kima edək, hara edək, bilmirik.