ABŞ Azərbaycana yatırılan sərmayələrin həcmini artıracaq - Maykl Lalli

21.11.2015 12:13     Ecoreaksiya     1990

“ABŞ Azərbaycana yatırılan sərmayələrin artmasını istəyir”.

Reaksiya.az APA-ya istinadən xəbər verir ki, bunu Azərbaycanda səfərdə olan ABŞ ticarət katibinin Avropa, Orta Şərq və Afrika regionu üzrə köməkçisinin müavini Maykl Lalli deyib.

Onun sözlərinə görə, ABŞ-ı təmsil edən biznes nümayəndələri Azərbaycana sərmayə yatırmaq üçün mühüm potensialın olduğu qənaətindədirlər:

“Sözügedən potensial nəinki inkişaf etmiş enerji sahəsinə aiddir, ABŞ-ın biznes nümayəndələri həmçinin qeyri-neft sektorunda da mövcud olan potensialdan istifadə etmək istəyirlər. ABŞ-ın Ticarət departamenti də Azərbaycanda bu mühüm potensialı görür. Məhz bu səbəbdən Ticarət departamenti bu səfəri təşkil edib. Səfər çərçivəsində ABŞ-ın biznes dairələrini təmsil edən 15 şirkətin nümayəndələri Azərbaycan tərəfdaşları ilə 100-dən artıq görüş keçirib. Səfər zamanı biz yalnız biznes, hər hansı sərmayələr, ticarət  münasibətləri barədə danışmırdıq. Biz həmçinin ABŞ-Azərbaycan arasında olan tərəfdaşlıq və eyni zamanda dostluq əlaqələrinə də toxunmuşuq. Məhz elə bu səbəbdən də ABŞ-ın Azərbaycandakı səfirliyi vasitəsi ilə bizim Ticarət Departamenti dövlət səviyyəsində olan tərəfdaşlarımızla, eyni zamanda özəl sektorda mövcud olan tərəfdaşlarımızla birgə fəaliyyət göstərərək Azərbaycana sərmayələrin artımı istiqamətində səylərini göstərəcək. Həm ABŞ, həm də Azərbaycanda biznesin inkişafı və bunun nəticəsi olaraq iş yerlərinin açılması istiqamətində də səy göstərəcəyik”.

Azərbaycanın müstəqillik tarixində ABŞ-ın ölkəmizə sərmayə yatırmaq baxımından ən aparıcı investorlardan olduğunu xatırladan M. Lalli bildirib ki, nümayəndə heyətinin bu səfəri bilavasitə iki ölkə arasında olan tərəfdaşlığın artırılmasına təkan verməkdir:

“ABŞ uzunmüddətli sərmayələrə maraq göstərir. Məhz buna  görə də bizim  sərmayələr enerji sektoruna yönələrək həmin bu layihələrin uzunmüddətli - 10, 20, 40 illik olduğunu nəzərə alırdı. ABŞ həqiqətən Azərbaycana yatırılan sərmayələrin artmasını istəyir və Azərbaycan prezidentinin iqtisadiyyatın diversifikasiyası məqsədinə qulluq edərək və bu məqsədə dəstək vermək üçün artıq qeyri-neft sektoruna yatırımları nəzər yetirir. Biz Azərbaycanda təchizat, tibbi, İKT, media və neft-kimya sahəsində irəliləmək istəyirik”.