“Fuad Turan" Fondu təsis edildi

12.10.2015 11:48     Maraqlı     2708

Bir il əvvəl yol qəzasında faciəvi şəkildə həyatını itirən gənc fəal  Fuad Abdurahmanlının xatirəsinə həsr olunmuş “Fuad Turan" Fondu və bu fondun təsis etdiyi “Fuad Turan” mükafatının təqdimat mərasimi keçirilib.

Reaksiya.az xəbər verir ki, mərasimə toplaşanlar mərhum gənc jurnalist, milli fəal Fuad Turan Abdurahmanlının tutduğu yolun, daşıdığı dəyərlərin önəmindən və təsis edilən bu fondun cəmiyyətə verəcəyi faydalardan, həmçinin fondların dünya və Azərbaycan tarixindəki əhəmiyyətindən bəhs ediblər.

Mərasimdə təsisi baş tutan “Fuad Turan Fondu”nun fəaliyyət istiqaməti haqqında iştirakçılara geniş məlumat verilib. Fondun əsas məqsədinin onun hesabına ediləcək şəxsi yardımlar, eləcə də fondun hər il təşkil edəcəyi xeyriyyə aksiyalarından əldə edilən ianələr hesabına azərbaycanlı gənclərin xaricdə təhsil almasına yardım etmək olduğu bildirilib.

Tədbirdə fondun idarə heyəti tərəfindən Əminə Əliyevanın “Fuad Turan Fondu”na sədr seçdiyi elan olunub. Sədr seçilən Əminə Əliyeva çıxış edərək xalqımızın yardımsevərliyi sayəsində ildən-ilə daha çox gəncimizin təhsil almasına yardımçı olacaqlarına ürəkdən inandığını vurğulayıb.

Həmçinin, hər il ənənəvi olaraq, Fuad Turan Abdurahmanlının doğum günündə fond tərəfindən mükafatın təqdim olunmasının nəzərdə tutulduğu da vurğulanıb. Belə ki, il ərzində öz sahəsində uğur qazanan bir azərbaycanlı gəncə “Fuad Turan” mükafatı təqdim ediləcək.

Mükafatın ilk sahibi çoxsaylı namizədlər sırasından seçilən, ADA universitetinin tələbəsi İsmayıl Zeynallı olub.