Paskal Mönyedən xatırlatma - "Ermənilərlə azərbaycanlılar sülh içində yaşayıb"

16.09.2015 10:39     Siyasi reaksiya     2066

“Mən ümid edirəm ki, mülki insanların həyatına son qoyan gərginliyin aradan qaldırılması üçün tərəflər əllərindən gələni edəcək”.

Reaksiya.az APA-ya istinadən xəbər verir ki, bu sözləri Fransanın Azərbaycandakı səfiri Paskal Mönye cəbhə xəttində artan gərginliklə bağlı sualları  cavablandırarkən deyib. O qeyd edib ki, təmas xəttində gərginliyin artması hər iki tərəfdən insanların ölməsi ilə nəticələnir: “Bu yaxınlarda Azərbaycanda insanlarla müzakirələr aparmışam və deyiblər ki, yüz illər boyu ermənilər və azərbaycanlılar sülh içində yaşayıblar. Bir çox insan bunun yenidən gündəmə gələcəyini ümid edir. Bu, həmçinin, xarici faktorlardan asılıdır”.

Səfir Azərbaycan və Ermənistan xarici işlər nazirləri arasında mümkün görüş məsələsinə də münasibət bildirib: “Mən bu barədə oxumuşam. Bilirəm ki, həmsədrlər xarici işlər nazirlərinin Nyu Yorkda  görüşü üzərində çalışırlar. Burda əsas məqsəd əlbəttə ki, Ermənistan və Azərbaycana Dağlıq Qarabağ münaqişəsində sülhə nail olunması istiqamətində yardım göstərməkdən ibarətdir”.

Avropada baş verən miqrant böhranına toxunan P. Mönye iqtisadi problemlər müşahidə olunduğu üçün bu cür miqrant dalğası ilə üzləşməyin çətinlik yaratdığını söyləyib: “Eyni zamanda bu insanlar ümidsiz vəziyyətdədirlər və biz onları köməksiz qoya bilmərik. Problem bu yükü necə bölüşdürmək lazım olduğunu bilməkdir. Bəzi ölkələr var ki, onların üzərinə daha çox yük düşür. Avrokomissiyada da ədalətli həll yolu tapmaq üçün bu istiqamətdə müzakirələr aparılır”.

Səfirin sözlərinə görə, böhranla əlaqədar əsasən həmin insanları pul qarşılığında bu cür şərtlər altında Avropaya gətirənləri mühakimə etmək lazımdır: “Bu problemləri onun mənbəyində həll etməliyik. Əgər problemin mənbəyində həll tapılmasa, o zaman bu, davam edəcək”.

Şərhlər