Çörək maşınında ölü inək tapıldı

04.12.2015 12:04     Sosreaksiya     2137

Ağstafada çörək daşımaq üçün istifadə edilən "VAZ 2104" markalı avtomobildə ölü inək aşkarlanıb. 

Reaksiya.az Kəpəz TV-yə istinadən xəbər verir ki, diqqətdən yayınmaq üçün təxminən 80-90 kiloqramlıq iribuynuzlu heyvanı çörək daşınan maşına yükləyən "qəhrəman" yararsız əti Kürətrafı kəndlərin birindən gətirib rayonda satmaq istəyərkən saxlanılıb. Lakin, sürücü maşını qoyub ərazidən uzaqlaşıb.

Yoxlamalar zamanı məlum olub ki, bir neçə gün öncə ölən inəyin başı kəsilərək satış məqsədilə çörək maşınına yığılıb. Cəsəd Rayon Baytarlıq İdarəsi əməkdaşlarının nəzarəti altında yandırılaraq zərərsizləşdirilib. Bölgədə belə halların baş verməməsi üçün reydlər keçirilir. Hazırda Kür çayı üzərində yerləşən postda avtomobillər polis və Rayon Baytarlıq İdarəsinin əməkdaşları tərəfindən ciddi şəkildə yoxlanılır.