Operativ qərargahda müşavirə keçirildi

07.12.2015 17:06     Sosreaksiya     1874

Azərbaycan Respublikası Dövlət Neft Şirkətinin (SOCAR) "Günəşli" yatağının 10-cu dərin dəniz özülü yaxınlığında yaradılmış operativ qərargahda müşavirə keçirilib.

Reaksiya.az APA-ya istinadən xəbər verir ki, hazırda operativ qərargahda olan fövqəladə hallar naziri, general-polkovnik Kəmaləddin Heydərov, Azərbaycan Respublikası Dövlət Neft Şikətinin prezidenti Rövnəq Abdullayev, Dövlət Sərhəd Xidmətinin rəisi, general-polkovnik Elçin Quliyev qəza-xilasetmə əməliyyatının gedişi ilə bağlı məsələləri müzakirə ediblər.

Qeyd edək ki, bu gün "Günəşli" yatağında baş vermiş qəza nəticəsində itkin düşənlərdən 6 nəfərinin cəsədi tapılıb.

Axtarış-xilasetmə tədbirləri davam etdirilir.

Eyni zamanda yanğının söndürülməsi istiqamətində işlər davam etdirilir.

Qeyd edək ki, dekabrın 4-də saat 17.40 radələrində “Günəşli” yatağındakı 10 saylı dərin dəniz özülündə güclü yanğın baş verib.

Hadisə baş verən zaman özüldə 63 nəfər xidmətdə olub, onlardan 29 nəfər itkin düşüb.