Sürücülərə yazılan bütün cərimələr sıfırlandı

05.03.2016 16:41     Sosreaksiya     817

Son günlər bəzi sürücülər elektron sistemdə cərimələri yoxlayarkən, asanpay.az saytında cərimələrlə tanış olarkən maraqlı mənzərə ilə üzləşirlər.

Belə ki, sistemdə sürücüyə yazılan cərimə, tarix və inzibati protokolun nömrəsi qeyd olunsa da, cərimə məbləği 0.0 manat kimi göstərilir. Bəzi sürücülər bunu cərimənin yalnış tətbiq edilməsi, bəziləri isə cərimənin silinməsi kimi qəbul edərək sevinsələr də, Baş Dövlət Yol Polisi İdarəsinin açıqlamasını da nəzərdən keçirmək lazımdır. İdarənin şöbə rəisi, polkovnik Kamran Əliyev bildirib ki, heç kimin cəriməsi silinməyib və yalnış yazılan cərimələrdən də söhbət gedə bilməz.

Sistemdə cərimələrin sıfırlanması isə texniki məsələdir: "Bildiyiniz kimi, yeni İnzibati Xətalar Məcəlləsi qəbul edilib və Dövlət Yol Polisi bəzi inzibati xətalara görə də elektron protokollar tərtib etməlidir. Bundan əlavə, tərtib edilmiş bütün elektron protokollar sürücülərin elektron kabinetinə, yəni asan ödəniş sisteminə yönləndirilməlidir.

Bu səbəbdən də hazırda Baş Dövlət Yol Polisi İdarəsinin elektron sistemində müəyyən texniki işlər həyata keçirilir. Sistem elə qurulmalıdır ki, cərimələr elektron kabinetə yerləşdirilərkən yalnışlıq olmasın, gələcəkdə hansısa problem ortaya çıxmasın. Bu səbəbdən də sürücülərə tövsiyə edirik ki, gözləsinlər, sistem tam hazır olduqdan sonra bütün cərimələr olduğu kimi görünəcək və cərimə məbləği də əksini tapacaq".

Avtosfer.az-ın məlumatına görə, Kamran Əliyev deyib ki, sistemdə yenidənqurma işləri yaxın günlərdə başa çatacaq və sürücülərə əlavə məlumat veriləcək. Hər hansı anlaşılmazlıq olarsa sürücülər Dövlət Yol Polisi İdarəsinin 902 "qaynar xətt"inə zəng edə bilərlər.