Prezident millət vəkilinə tapşırıq verib

30.04.2016 14:03     Sosreaksiya     927

Prezident bizə tapşırıb ki, hökumətə münasibətindən asılı olmayaraq, ən müxtəlif dünyagörüşə malik olan QHT-lərin layihləri dəstəklənsin, onların problemlərinin həlli istiqamətində addımlar atılsın.

Axar.az xəbər verir ki, bu fikirləri Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasınn sədri, millət vəkili Azay Quliyev Mədən Sənayesində Şəffaflığın Artırılması Koalisiyasının bu gün keçirilən ümumi yığıncağındakı çıxışında səsləndirib.

A.Quliyev bildirib ki, koalisiyaya daxil olan QHT-lərin əksər problemləri həll olunub:

“Proses davam edir, çalışırıq ki, bütün problemlər qısa vaxt ərzində həllini tapsın. Beynəlxalq donor təşkilatlarının dəstəklədiyi qrant proqramları icrası zamanı şəffaflığa, layihələrin effektivliyinə və nəticəli olmasına, eləcə də, Azərbaycanın milli təhlükəsizliyinə ciddi diqqət ayırmaq vacibdir. Həyata keçirilən layihələr mahiyyət etibarı ilə dövlətə, xalqa, cəmiyyətə xidmət etməlidir. QHT-lərə Dövlət Dəstəyi Şurası bundan sonra da MSŞT Koalisiyası ilə əməkdaşlığını davam etdirəcək. Biz bütün təklif və təşəbbüslərə açığıq”.