12 yaşlı uşaqlar çörək oğurluğuna görə həbs ediliblər? - Rəsmi açıqlama

02.06.2016 20:31     Sosreaksiya     1384

Cəlilabad rayon Polis Şöbəsi Cəlilabad rayonunda 10-12 yaşlı uşaqların çörək və qənd oğurluğuna görə həbs edilmələriylə bağlı yayılan məlumatlara münasibət bildirib. 

Şöbənin Cinayət Axtarış Bölməsinin polis kapitanı Nəbi Cəfərov AzNews.az-a açıqlamasında uşağın həbs edilməsi faktını təsdiqləyib: “Lakin hadisə Cəlilabad rayonunda olmayıb. Həmin uşaqlar Biləsuvar rayonunda bir mağazadan ərzaq məhsulları oğurlayıblar. Onlar oğurladıqları ərzaq məhsularını gətirib Cəlilabad rayonun “İran bazarı” deyilən ərazisində satmaq istəyərkən yaxalanıblar”.

N.Cəfərov qeyd edib ki, hazırda faktla bağlı Biləsuvar rayon Polis Şöbəsində cinayət işi açılıv və araşdırma gedir: “Müstəntiq həmin uşaqları hadisə yerinə gətirib. Uşaqlar satdıqları ərzaq məhsullarını kimə verdiklərini maddi sübut olaraq göstəriblər”. 

Qeyd edək ki, yayılan məlumatlarda uşaqların “İran bazarı” adlı yerdən çörək və qənd oğurladıqları üçün saxlanıldıqları bildirilir.