Sumqayıtda şəhidlərin anım tədbiri keçirilib - FOTOLAR

12.07.2016 21:14     Sosreaksiya     1660

Azərbaycan Respublikasının Prezidenti yanında Qeyri- Hökumət Təşkilatlarına Dövlət Dəstəyi Şurasının maliyyə dəstəyi ilə “Vətənpərvərliyin təbliğində ictimai dəstəyin artırılması” adlı layihə çərçivəsində “Əsgər Ailələrinə Dəstək” İctimai Birliyi Sumqayıt şəhərində anım tədbirlərində olub.

12 iyulda aprel döyüşlərində  həlak olan şəhid polkovnik-leytenant  Raqub Orucovun və kiçik gizir Seymur Baxışovun doğum günüdür. Sumqayıt şəhərində anım mərasimi Şəhidlər xiyabanında şəhidlərin doğmalarının, döyüşçü yoldaşlarının, QHT və ictimaiyyət nümayəndələrinin iştirakı ilə keçirildi.

Əsgər Ailələrinə Dəstək İctimai Birliyinin sədri Mətanət Əsgərqızı polkovnik- leytenant Raqub Orucovun həyat yoldaşı Sevinc Orucova, şəhid Seymur Baxışovun  anası Zemfira Baxışova və  həyat  yoldaşı  Aynur Baxışova ilə  görüşərək minnətdarlığını bildirib ki, vətən üçün onların doğmaları, əzizləri böyük fədakarlıqlar ediblər: “Burada keçirilən mərasim bir vətənpərvərlik tədbiridir” deyən  İctimai Birlik sədri onu da vurğulayıb ki, iştirak edən gənclər görəndə ki, vətən uğrunda canlarından keçənlər unudulmur, ailələri qayğıyla əhatə olunur onlar Azərbaycanımıza  daha çox bağlı, daha sədaqətli olarlar. Daha sonra şəhid ailələri  bu çətin günlərdə yanlarında olduqlarına, qayğıya, diqqətə görə dövlətimizə, millətimizə minnətdarlıq bildiriblər.

Raqub Orucovun həyat yoldaşının dediklərindən: “Raqub şəhid olandan yuxuma girmirdi. Gündüzlər Allaha yalvarırdım ki, nə ola, bircə dəfə yuxuma gəlsin, təskinlik versin. Ölümündən sonra ilk dəfə bu gecə yuxuma gəldi. Sağ əlini başıma çəkir ki, niyə belə edirsən? Görürəm, dayandığımız yer Ağdam deyil, başqa yerdir. Möhkəm yağış yağır, sudan imkan tapıb yeriyə bilmirəm. Amma hissiyyatım deyir ki, işğaldan azad olunmuş torpaqlardayam. İndi Raqubun da mənim də anadan olduğumuz  torpaqlar işğal altındadır. Amma yuxumdakı yer nə Ağdamdı, nə Qubadlı. Elə yuxuda sevinirəm ki, Raqub yuxuma girib…

Cəbhə xəttində  baş verən aprel döyüşlərində şəhid olan hərbçilərimizdən biri də kiçik gizir Seymur Baxışovdu. Anası  Zemfira xanım Seymurun  nişanəsi olan övladı ilə təskinlik tapdığını söyləyir. Həyat  yoldaşı  Aynur  xanım  deyir ki, ilk dəfə yuxumda  görəndə  dedim ki, kaş evdən getməyəydin. Sağ qalardın, birgə qocalardıq. O isə məni pəncərə tərəfə aparır və  bir maşın göstərir. O maşın  tamam  əzilmiş vəziyyətdə idi. Seymur dedi ki, seç, qəzada ölməyimi istərdin ya vətən uğrunda...

Əsgər Ailələrinə Dəstək İctimai Birliyinin sədri Mətanət  Əsgərqızı  Sumqayıt  şəhərində daha  bir  şəhidimizin Əbdülməcid Axundovun  anası  Ceyran  Axundova  ilə də görüşüb. Şəhid anası onu yad edən bütün insanlara minnətdarlığını  bildirdi. Onu da xahiş edib ki, oğlu üçün heyiflənməsinlər, çünki  Əbdülməcid   yaşayır, böyük  amal, torpaqlarımızın  azadlığı uğrunda şəhid olublar. "Aprel ayı həyatımın ən acı ayı oldu. Düzdür, bu ayda oğullarımızın qanı bahasına müəyyən ərazilər azad edildi. Ancaq öz-özümə sual verirəm ki, bu ayı sevim ya nifrət edim? Bu suala cavab verməyə də çətinlik çəkirəm" bunu o, deyir, şəhidimiz Əbdülməcid Axundovun  anası  Ceyran  Axundova.

Şəhidlərin doğmaları onları yad edən insanlara bir daha minnətdarlıq bildirdilər.  İctimai Birlik sədri Mətanət Əsgərqızı onu qeyd etdi ki, bu gün hər kəs şəhid ailələrinə çox diqqətlə yanaşmalı və qayğı göstərməlidilər. Əgər bunu ölkənin birinci şəxsləri, cənab İlham Əliyev və xanımı Mehriban Əliyeva edirsə, demək hər bir məmur onlardan nümunə götürməlidir.  Ölkənin birinci xanımı, Heydər Əliyev Fondunun Prezidenti  Mehriban Əliyevanın  şəhidlərin yas mərasimində  çıxışı, onlara diqqəti buna misaldır.