Bakıda yanan bina ilə bağlı məmur həbs edilib?

Mayın 19-da Bakının Binəqədi rayonunda yanan 16 mərtəbəli bina ilə əlaqədar aparılan istintaq zamanı Respublika Gigiyena və Epidemiologiya Mərkəzinin direktoru Akif Əlibəyovun saxlanılması barədə məlumatlar yayılıb. ANS PRESS-in məlumatına görə, bəzi kütləvi informasiya vasitələri yazıblar ki, dünən Akif Əlibəyovla birlikdə Mərkəzin rəhbərliyinə daxil olan bir neçə şəxs və laboratoriya müdiri də saxlanılıblar.

 

Məlumatı dəqiqləşdirmək üçün Respublika Gigiyena və Epidemiologiya Mərkəzinin ictimaiyyətlə əlaqələr şöbəsinin rəhbəri Anar Qədirlilə əlaqə saxladıq. Qurum rəsmisi ANS PRESS-ə açıqlamasında yayılan məlumatların həqiqəti əks etdirmədiyini bildirdi. Onun sözlərinə görə, nə Akif Əlibəyov, nə də qurumun başqa əməkdaşları saxlanılmayıblar.

 

Anar Qədirli onu da bildirib ki, onlar faciə ilə bağlı istintaqa informasiya təqdim ediblər: “Akif Əlibəyov iş başındadır. Bizim heç bir əməkdaş saxlanılmayıb. Araşdırmalar aparılır. İstintaqa lazım olan matreallar təqdim olunub. Düşünürəm ki, bu adi hüquqi proseduradır”.

 

Qeyd edək ki, mayın 19-da Bakının Binəqədi rayonunda yerləşən 16 mərtəbəli binada baş verən yanğın nəticəsində 4-ü azyaşlı olmaqla 15 nəfər ölüb, 56 insan müxtəlif dərəcəli bədən xəsarəti alıb.

 

Faktla bağlı Baş Prokurorluğun Ağır Cinayətlərə dair İşlər üzrə İstintaq İdarəsində Cinayət Məcəlləsinin 225.2-ci - ehtiyatsızlıqdan zərərçəkmiş şəxsin ölümünə və digər ağır nəticələrə səbəb olan yanğın təhlükəsizliyi qaydalarını pozma, 308.2-ci - vəzifə səlahiyyətlərindən sui-istifadə və 314.2-ci - ağır nəticələrə səbəb olan səhlənkarlıq maddələri ilə cinayət işi başlanılıb. Hadisəni araşdırmaq üçün Baş Prokurorluğun, Daxili İşlər və Fövqəladə Hallar nazirliklərinin təcrübəli əməkdaşlarından ibarət istintaq-əməliyyat qrupu yaradılıb.