“Pulu qayıtmayanlara” xoş xəbər - VİDEO
23.05.2018 15:50 Sosreaksiya 1228
ARB TV-nin “Günə doğru” verilişi ödəmə terminallarından qalığını götürə bilməyənlər üçün reportaj hazırladı.
Ölkədə ödəniş terminallarının strukturuna dəyişiklik edilir. Bundan sonra ödəniş terminallarındakı əməliyyatlar zamanı qalan qalıq pul müştəriyə veriləcək. Ancaq qalıq pulların qaytarılması nəğd şəkildə deyil, kod formasında olacaq. İlkin mərhələdə qalıq pulun qaytarılması prosesi ancaq sığorta ödənişlərinin ödənilməsi zamanı baş verəcək.
Sakin: “Elə olub ki, ödənişim olub 12 manat 50 qəpik, ödəmişəm 13 manat. Qalıq qayıtmayıb. Qaytarılsa yaxşıdı”.
Sakin: “18 manat ödəməliyəm, cibimdə 20 manat var. Bir də getməliyəm bir şey almalıyam ki, xırdalasınlar”.
Sakin: “Onsuz da ödəyirik artıqlaması ilə. Gələn ay da ödəyəndə çıxılır”.
Şahin Səmədli - Marketinq meneceri: “Deyək ki, hansısa bir müştəri daxil olacaq ödəmə üçün provayderə. Misal üçün 73 manat 50 qəpik borcu olacaq, amma həmin müştəri 75 manat daxil edir. Bu halda ona 1 manat 50 qəpik məbləğində kod veriləcək qəbzin üzərində".
Bundan sonra təqdim edilən 14 rəqəmli kodla vətəndaş yalnız kommunal və mobil operatorların xidmətlərindən istifadə edə bilər. Prosesə isə bir neçə aydan sonra başlanacaq. İqtisadçı Rəşad Həsənov hesab edir ki, ödəniş terminallarını quraşdıran şirkətlər avadanlıqlarını qabaqcadan bu sistemə keçirməlidir. İndiki halda qalıq pulların qaytarılması prosesini yalnız sığorta ödənişlərində tətbiq etmək heç də bir mənalı qarşılanmır.
Rəşad Həsənov – İqtisadçı: “Nəzərə alsaq ki, ölkədə terminallar üzrə ödəniş 2 milyarda yaxındır və burada kiçik bir rəqəmlə qalığın qaytarılmaması müşahidə olunarsa, o zaman yayınma 20 milyon manat həcmindədir”.
Xatırladaq ki, ölkə üzrə emanat terminallarının sayı 2100 ədəddən çoxdur. Ay ərzində bu terminallarda 6 milyon əməliyyat baş tutur.
Şərhlər