Şöbə müdiri: “MTRŞ qeyri-nümunəvi insanların verilişlərə dəvət edilərək yersiz gərginliklər yaradılmasının əleyhinədir”
17.09.2018 12:50 Sosreaksiya 706
“Milli Televiziya və Radio Şurasının ötən cümə günü keçirilmiş iclasında telviziya və radio məkanında mövcud durum, yeni mövsüm hazırlıqları və ötən mövsümün dəyərləndirilməsi ilə bağlı məruzə dinlənilib. Monitorinq nəticələrinin əksini tapdığı məruzədə yayımçıların yeni mövsümə hansı yeniliklərlə başlamaları, hansı yeni layihələrin, serialların, verilişlərin proqramlarda yer almaları və s. öz əsini tapıb. Ümumilikdə ötən yayım mövsümü qənaətbəxş qiymətləndirilsə də, qanun pozuntuları, efir etikasına, mənəvi dəyərlərə zidd hallara yol verilən verilişlərin də az olmadığı və onlara qarşı müvafiq tədbirlər görüldüyü məruzədə öz əksini tapıb”.
Bunu “Report”a Milli Televiziya və Radio Şurasının Ekspertiza, proqramlaşdırma və analitik şöbəsinin müdiri Təvəkkül Dadaşov bildirib.
Onun sözlərinə görə, iclasda xüsusi olaraq vurğulanıb kii, Şura qanunvericiliyin konkret tələbi pozulmadan verilişləri keyfiyyətsizliyinə, bayağılığına, dəvət etdiyi qonaqlarının səviyyəsinə görə yayımdan qaldırmaq səlahiyyətində deyil. Lakin bununla belə, yayımçıların yaradıcılıq fəaliyyətinə qarışmadan milli efir məkanında reytinq bəhanəsilə aşağı səviyyəli verilişlərin efirə verilməsini, cəmiyyət içində qeyri-nümunəvi insanların mütəmadi olaraq verilişlərə dəvət edilərək yersiz gərginliklər yaradılmasını doğru hesab etmir və belə halların əleyhinədir. “Şura bu məsələdə kanal rəhbərlərini daha həssas olmağa dəvət edir. Yeni mövsümdə belə hallara qarşı daha ciddi yanaşılmasını tələb edir. Əgər yeni mövsümdə də xoşagəlməz halar davam etsə və bu hallar qanun pozuntularına gətirib çıxarsa, heç bir güzəşt olunmayacaq”, - T.Dadaşov əlavə edib.
Şərhlər