77 nəfərin zəhərləndiyi şadlıq sarayı bağlandı

11.08.2015 12:24     Sosreaksiya     1842

Paytaxtın Binəqədi rayonunda 77 nəfərin zəhərlənməsinə səbəs olan "Zəngəzur” şadlıq sarayı bağlanıb.

Respublika Gigiyena Mərkəzinin Qidalanma gigiyenası şöbəsinin müdiri İmran Abdullayev bu barədə "Reaksiya"ya açıqlamasında bildirib. 

Şöbə müdirinin sözlərinə görə, aparılan araşdırmalar zamanı şadlıq sarayında ərzaqların saxlanması və hazırlanmasında kobud qayda pozuntusuna yer verilib:

"Hadisə də elə bu səbəbdən baş verib. Elə məhz buna görə də şadlıq sarayı bağlanıb”. 

İ. Abdullayev onu da əlavə edib ki, şadlıq sarayında gigiyena qaydalarına riayət edilərsə, Gigiyena Mərkəzi tərəfindən dezinfeksiya tədbirləri görüldükdən sonra bərpası yenidən həyata keçirilə bilər.

Hadisə ilə əlaqədar Binəqədi Gigiyena İdarəsi artıq Binəqədi prokurorluğuna müraciət edib.

Hadisəyə hüquqi qiymət prokurorluğun hadisədə “inzibati” yaxud “cinayət” nöqsanı olduğunu dəqiqləşdirdikdən sonra məlum olacaq.

"Ancaq şadlıq sarayı bütün bu tədbirlər bitənədək bağlı qalacaq" - deyə şöbə müdiri əlavə edib.

Onu da əlavə edək ki, xəstəxanaya müraciət edənların sayı artmaqda davam edir. Belə ki, dünən xəstəxanaya 77 nəfər müraciət etmişdi. Bu gün isə müraciət edənlərin sayı 88-ə çatıb.

Xəstəxanada isə 31 nəfər palatalarda müayinə edilir.