Səhiyyə işçilərinin əməyinin ödənilməsi qaydasına dəyişiklik edilib

23.11.2020 15:55 Sosreaksiya 586

İcbari Tibbi Sığorta üzrə Dövlət Agentliyinin müvafiq qərarı ilə “Tibbi Ərazi Bölmələrini İdarəetmə Birliyi” publik hüquqi şəxsin tabeliyindəki tibb müəssisələrində çalışan səhiyyə işçilərinin əməyinin ödənilməsi Qaydası”nda dəyişiklik edilib.

Bu barədə Report-a Dövlət Agentliyindən məlumat verilib.

Bildirilib ki, qaydaya əsasən, tibb işçilərinin əməkhaqlarına vəzifə (tarif) maaşları, əmək şəraitinə görə ödənilən əlavələr, həvəsləndirici əlavələr və Əmək Məcəlləsində nəzərdə tutulmuş digər ödənişlər daxildir. Tibb işçilərinə həvəsləndirici əlavələr vəzifədən və yerinə yetirilən işin xüsusiyyətindən asılı olaraq, aylıq sabit və ya işin nəticələrinə görə aylıq həvəsləndirici əlavələr şəklində verilir.

Dəyişikliyə əsasən, tibb işçilərinə verilən sabit həvəsləndirici əlavələr üzrə ixtisasların/vəzifələrin sayı artırılıb və yeni redaksiyada təsdiq edilib. Əvvəlki Qaydaya görə 9 ixtisas/vəzifə üzrə həkimlərə aylıq sabit həvəsləndirici əlavə verilirdisə, yeni dəyişikliyə əsasən hazırda bu say artırılaraq 16-ya yüksəlib.

Bununla yanaşı, bir sıra ixtisaslar/vəzifələr üzrə sabit həvəsləndirici əlavələrin məbləği tibb müəssisələrinin fəaliyyət göstəricisindən asılı olaraq müəyyənləşdirilib. Belə ki, tibb müəssisələri 3 qrupa (1-ci, 2-ci və 3-cü qruplar) bölünüb (Cədvəl 1).

Cədvəl 1.

№	İxtisasın/vəzifənin adı	Həkimlərin əməkhaqlarına tətbiq edilən aylıq sabit həvəsləndirici əlavələrin məbləği
1	Tibbi şöbələrin (bölmələrin) müdirləri (həkim-stomatoloqlar istisna olmaqla)	100 manat
2	Səhiyyə xidmətlərinin təşkili şöbəsinin həkimləri (həkim-stomatoloq istisna olmaqla)	200 manat
3	Provizor vəzifəsi üzrə çalışan həkimlər	260 manat
4	Ailə həkimi ixtisasları üzrə çalışan həkimlər	300 manat
5	Hemodializ şöbəsinin həkimləri	360,00 manat
6	Uşaq nevroloji sanatoriyasının həkimləri (psixoloq və loqoped istisna olmaqla)	200,00 manat
7	Həkim-dietoloq ixtisası üzrə çalışan həkimlər	200,00 manat
8	Həkim-patoloq-anatom	200,00 manat
9	Həkim-ftiziatr	300,00 manat
10	Həkim-hematoloq	300,00 manat
11	Həkim-laborant ixtisası üzrə çalışan həkimlər	1-ci qrup tibb müəssisələri	240,00 manat
		2 və 3-cü qrup tibb müəssisələri	340,00 manat
12	Həkim-statistik vəzifəsi üzrə çalışan həkimlər	1-ci qrup tibb müəssisələri	240,00 manat
		2 və 3-cü qrup tibb müəssisələri	340,00 manat
13	“Ailə Sağlamlıq Mərkəzi” şöbəsinin rəhbəri vəzifəsi üzrə çalışan həkim	480,00 manat
14	Həkim-anestezioloq-reanimatoloq ixtisası üzrə çalışan həkimlər
	Qadın məsləhətxanasında və Ailə Sağlamlıq Mərkəzində çalışan həkim mama-ginekoloq
15	Aptek bölümünün rəhbəri vəzifəsi üzrə çalışan həkim	1-ci qrup tibb müəssisələri	370,00 manat
		2 və 3-cü qrup tibb müəssisələri	570,00 manat
16	Keyfiyyətə nəzarətin idarəedilməsi komitəsinin rəhbəri	2 və 3-cü qrup tibb müəssisələri	910,00 manat
	*Bundan əlavə, həkimlərə xidmətə görə həvəsləndirici əlavələr verilir.

Cədvəl 1-in 6-cı, 9-cu və 14-cü bəndləri istisna olmaqla, digər bəndlər 21 yanvar 2020-ci il tarixindən qüvvəyə minir. 9-cu bənd 01 yanvar 2020-ci il tarixindən, 6-cı və 14-cü bənd isə 26 oktyabr 2020-ci il tarixindən qüvvəyə minir.

Aylıq həvəsləndirici əlavələr isə həkimlərə ixtisasları/vəzifələri üzrə göstərilən xidmətin ölçülməsi və dəyərləndirilməsi məqsədilə verilir. Optimal iş yükünü və iş saatlarını nəzərə alaraq, həkimlərin xidmətlərinin yuxarı kəmiyyət həddi məhdudlaşdırılır və yuxarı kəmiyyət həddini aşaraq göstərilən tibbi xidmətlərə görə əlavələr ödənilmir.

Reanimasiya ilə yanaşı, yeni dəyişikliyə görə intensiv terapiya və anesteziologiya, intensiv terapiya bloklarında çalışan həkimlərə hər gecə növbəsi üçün 30 manat, gecə növbəsi zamanı tibbi xidmət göstərilən hər pasiyent üçün 5 manat məbləğində normativlərlə bağlı əlavələr verilir.

Orta və kiçik tibb işçilərinin göstərdikləri xidmətlərin xüsusiyyətləri nəzərə alınaraq, onların aylıq vəzifə (tarif) maaşlarına tətbiq edilən həvəsləndirici əlavələr tutduqları vəzifələrdən asılı olaraq aylıq sabit əlavələr şəklində təyin olunur. Dəyişikliyə əsasən iki vəzifə üzrə aylıq sabit əlavələr tibb müəssisələrinin təsnifat qrupuna əsasən müəyyənləşdirilib. Belə ki, Qaydanın 19.1-ci bəndi üzrə 6-cı və 9-cu sətirlərə Cədvəl 2-dəki dəyişikliklər edilib. Qərara əsasən bu dəyişikliklər 01 yanvar 2020-ci il tarixindən qüvvəyə minir.

Cədvəl 2.

№	Struktur vahidin/vəzifənin adı	Sabit əlavələrin məbləği
6	Baş tibb bacısı (qardaşı) vəzifəsində çalışan orta tibb işçisi	1-ci qrup tibb müəssisələri	350,00 manat
		2 və 3-cü qrup tibb müəssisələri	790,00 manat
9	Baş təsərrüfat bacısı (qardaşı) vəzifəsində çalışan kiçik tibb işçisi	1-ci qrup tibb müəssisələri	150,00 manat
		2 və 3-cü qrup tibb müəssisələri	210,00 manat

Həmçinin tibb müəssisəsinin rəhbərliyinə və qeyri-tibb işçilərinə verilən aylıq həvəsləndirici əlavələr üzrə təsnifat qrupunda da dəyişiklik edilib (Qaydanın 16-4-cü bəndi). Tibb müəssisəsinin rəhbərliyinə və qeyri-tibb işçilərinə verilən aylıq həvəsləndirici əlavələr 21 yanvar 2020-ci il tarixindən qüvvəyə minir.

Qərarda qeyd edilən bütün digər bəndlər isə 26 oktyabr 2020-ci il tarixindən qüvvəyə minir.

Reaksiya.az