"Bu yurdun döyünən ürəyi olmaq üçün burdayam" - FOTOLAR

15.10.2015 17:20     Sosreaksiya     1919

62 saylı Saatlı seçki dairəsindən deputatlığa namizəd Əflatun Amaşov seçkiqabağı təbliğat-təşviqat kampaniyasına start verib.

Reaksiya.az xəbər verir ki, deputatlığa namizəd kampaniya çərçivəsindəki ilk görüşlərini Saatlı rayonunun Qarayev, Çolpu, Nəsimikənd, Fətəlikənd və Günəşli kəndlərində keçirib.

Ə. Amaşovla birlikdə sözügedən kəndlərin ağsaqqallarının, tanınmış şəxslərinin qatıldıqları görüşlərdə Bakı Dövlət Universitetinin jurnalistika fakultəsinin professoru Cahangir Məmmədli, «525-ci qəzet»in baş redaktoru Rəşad Məcid, «Xalq qəzeti»nin baş redaktor müavini Tahir Aydınoğlu, «Bakı xəbər» qəzetinin baş redaktoru Aydın Quliyev də iştirak edib.

Media təmsilçiləri çıxışlarında Ə.Amaşovu bacarıqlı təşkilatçı, səmimi və işgüzar insan kimi xarakterizə edən cəhətlərdən söz açıblar.

Deputatlığa namizədin həyat yolundan bəhs edən natiqlər bildiriblər ki, Ə.Amaşov Moskva Dövlət Universitetinin jurnalistika fakultəsini bitirdikdən sonra ömrünü məhz bu peşəyə sərf edib. Uzun illər Azərbaycan Dövlət İnformasiya Agentliyindən müxtəlif vəzifələrdə, o cümlədən baş direktorun birinci müavini kimi çalışıb. Onlar deputatlığa namizədin Azərbaycanda jurnalistikanın təşkilatlanması sahəsindəki fəaliyyətinin üzərində xüsusi dayanıblar. Mövcud xüsusda Ə.Amaşovun müxtəlif ictimai-siyasi baxışları özündə birləşdirən qələm sahiblərinin ortaq məxrəcə gətirilməsi, media-ictimaiyyət, media-hakimiyyət münasibətlərinin tənzimlənməsi, cəmiyyətdə jurnalistikanın nüfuzunun yüksəldilməsi istiqamətindəki işləri yada salınıb.

Rəşad Məcid Ə.Amaşovun əməksevərlik keyfiyyətlərini Milli Məclisin deputatı kimi daha yüksək səviyyədə davam etdirəcəyinə inandığını dilə gətirib.

Cahangir Məmmədli bildirib ki, Saatlı rayonu 62 saylı seçki dairəsinin seçiciləri bu deputatlığa namizədə səs verməklə həyatın çətinliklərini görən və duyan, problemlərin həllinə köməyini əsirgəməyən adama etimad göstərmiş olacaqlar.

Aydın Quliyev Amaşovun görüş iştirakçılarına paylanmış bukletlərində ifadə olunan mərama sadiq qalacağına əminliyini ifadə edib. Bu sadiqliyin həqiqi jurnalistlərin dəstəyinə əsaslandığını önə çəkib.

Eyni fikri davam etdirən Tahir Aydınoğlu onu da vurğulayıb ki, Ə.Amaşov bütün varlığı ilə Azərbaycan üçün çalışan dəyərli ziyalıdır. Belə bir adamın Milli Məclisin deputatı adını qazanması təkcə jurnalistikanın uduşu deyil, eyni zamanda bu peşənin ictimai missiyasının hədəfi olan xalq rifahının, demokratik cəmiyyət quruculuğu xəttinin növbəti təntənəsi olardı.

Çıxış edənlər bütün bunları əsas gətirərək seçiciləri 1 noyabr parlament seçkisində Əflatun Əhməd oğlu Amaşova səs verməyə çağırıblar.

Deputatlığa namizəd çıxışında isə müstəqil Azərbaycanın dəyərlər sisteminin davamlılığı və yeni inkişaf çalarları əldə etməsi xalqın bu il noyabr ayının 1-də keçiriləcək seçkidə etimad göstərəcəyi vətən övladlarının üzərinə düşəcəyini bildirib: “Mən bu gün sizlərin etimadını qazanmaq istəyi ilə buradayam. Gürcüstanda, Borçalı elində dünyaya göz açmışam. Bakıya ali təhsil almağa gəldiyim dövrdə ilk səfər etdiyim rayon məhz Saatlı olub. Jurnalist kimi Azərbaycan Dövlət İnformasiya Agentliyində fəaliyyətə başladığım dönəmlərdə ilk reportajımı da məhz bu rayondan hazırlamışam. O zaman bu reportajı çox böyük uğur hesab edirdim. Jurnalist fəaliyyətimin ilk uğuru. Zaman keçdi və düşünürəm ki, sevimli peşəm uğurlarıma yenilərini əlavə etdi. Burada dostlarım bir çox məqamlardan söz açdılar. Xoş sözlərə, verdikləri dəyərə görə hər birinə minnətdaram. Uğurlarımda pay sahibidirlər. Ancaq hesab edirəm ki, Milli Məclisin deputatı olmaq xalqına xidmət etmək istəyən hər bir şəxsin ən ali uğurudur. Mən mənə cəmiyyətdə nüfuz qazandıran, ilk peşə uğurumun açarı olan Saatlı yurdunun ən ali uğurum üçün də körpü rolunu oynayacağına inanıram. Bu yurdun səmimi, işgüzar insanlarının etimadını qazanmaq, onların görən gözü, eşidən qulağı, döyünən ürəyi olmaq üçün burdayam”.

Ə.Amaşov özünün seçki platformasında yer alan bir sıra məqamlar üzərində də dayanıb.

O bildirib ki, qanunların qəbulu vətəndaşların rifah halının yaxşılaşdırılmasına yönələn missiyadır. Prinsipial məqam isə vətəndaşların dövlətə etimadının qorunmasıdır. Müstəqil Azərbaycan Şərqdə ilk demokratik respublika olan Azərbaycan Xalq Cümhuriyyəti ənənələrinin davamçısıdır. Bu baxımdan ölkəmiz həmçinin parlamentarizm ənənəsinin də daşıyıcısı kimi çıxış edir.

“Bu ənənələrə sadiqlik ruhunu özündə yaşadan namizəd kimi bildirirəm ki, seçicilərin etimadını qazanacağım təqdirdə Azərbaycan Respublikasının Milli Məclisinin deputatı kimi xalqa xidmət meyarlarında ölkə parlamentinin daha işlək struktur olaraq fəaliyyətinə kömək göstərəcək təkliflərlə cıxış edəcəm. Bu təkliflərdə sizlərin mənafeyi əksini tapacaq. Üzləşdiyiniz problemlərin kompleks həlli başlıca qayğılarımdan olacaq.

Muğan düzündə yerləşən Saatlı rayonu respublikamızın digər bölgələri kimi iqtisadi inkişaf yolundadır. Bu inkişaf Ulu Öndər Heydər Əliyevin müəyyənləşdirdiyi, Prezident İlham Əliyevin həyata keçirdiyi siyasətin ən böyük uğurudur. Əgər seçilərəmsə, deputat kimi fəaliyyətim mövcud dəst-xəttə sadiqlik ruhuna köklənməklə sizlərin rifah halının daha da yaxşılaşdırılmasına yönələn təşəbbüslərin qaldırılmasına əsaslanacaq. Kənd təsərrüfatı məhsulları istehsalının stimullaşdırılması tədbirlərinin davamı üçün müvafiq qanunvericilik təşəbbüləri ilə çıxış edəcəm, aqrar sektora xüsusi qayğının göstərilməsinə yönələn qanunvericilik təşəbbüsləri qaldıracam. Şəhid ailələrinin, Qarabağ müharibəsi veteranlarının, əlillərin, qayğıya ehtiyac duyan digər kateqoriyadan olan insanların üzləşdiyi çətinliklərin aradan qaldırılmasını diqqət mərkəzində saxlamağa yönələn təkliflər hazırlamaq fəaliyyətimin əsasını təşkil edəcək. Təhsil, səhiyyə və mədəniyyət sahəsindəki işlərin perspektiv faydasını təmin etmək də son dərəcə vacibdir. Deputat seçilərəmsə, həmçinin Azərbaycan reallıqlarınının, xüsusən Dağlıq Qarabağ həqiqətlərinin dünya ictimaiyyətinə çatdırılması istiqamətində işlərin həyata keçirməsini planlaşdırıram”, - deyən Ə.Amaşov fikrinə aydınlıq gətirib.

Ə.Amaşov seçicilərə həmçinin seçki platformasında jurnalistika ilə bağlı məqamların da yer aldığını diqqətə çatdırıb: “Media cəmiyyətin güzgüsüdür. Hesab edirəm ki, sizlərin mənafeyi mediada nə qədər peşəkarlıqla işıqlandırılsa, bir o qədər ümumi işimiz üçün faydalı olar. Bunun üçünsə ilk növbədə media orqanlarının daha mütəhərrik qaydada fəaliyyət göstərməsi zəruridir. Güclü media idarəçilikdə və digər sahələrdə yaranan problemlərin aradan qaldırılmasının ən effektiv üsuludur. Güclü media həmçinin ölkəmizdə gün-gündən dərinləşməkdə olan demokratik, hüquqi dövlət quruculuğu prosesinin mühüm katalizatoru, ictimai faktorudur. Mövcud faktoru daha da gücləndirmək əzmindəyəm”.

Görüşlər qarşılıqlı müzakirələr şəraitində keçib. Seçicilərin müxtəlif məsələlər barədə sualları ətraflı cavablandırılıb.

Qeyd edək ki, Azərbaycan Respublikasının Milli Məclisinə 62 saylı Saatlı seçki dairəsindən deputatlığa namizəd Əflatun Amaşovun seçkiqabağı təbliğat-təşviqat kampaniyası çərçivəsindəki görüşləri davam edir. Seçicilərlə növbəti belə təmasların 16 oktyabr 2015-ci il tarixdə Saatlının Sımada, Mircəlal, Şirinbəyli, Soltanabad və Qara Nuru kəndlərində reallaşdırılması nəzərdə tutulur.