Respublika üzrə müşahidəçilik üçün müraciət vaxtı sabah başa çatır

21.10.2015 11:26     Sosreaksiya     1743

Bu il noyabrın 1-də keçiriləcək Milli Məclisə seçkilərdə Azərbaycanın bütün ərazisində müşahidə aparılmasına dair ərizələrin Mərkəzi Seçki Komissiyasına (MSK) təqdim edilmə müddəti sabah - oktyabrın 22-də başa çatır.

Reaksiya.az "Report"a istinadən xəbər verir ki, parlament seçkilərini aktiv seçki hüququna malik Azərbaycan vətəndaşı öz təşəbbüsü ilə, qeydə alınmış namizədin, siyasi partiyanın, siyasi partiyalar blokunun, seçkilər sahəsində fəaliyyət göstərən qeyri-hökumət təşkilatının təşəbbüsü əsasında və beynəlxalq müşahidəçilər izləyə bilərlər.

Beşinci çağırış Milli Məclisə seçkilərin hazırlanıb keçirilməsi üzrə əsas hərəkət və tədbirlərin Təqvim Planına əsasən, bunun üçün seçkilərin elan edildiyi gündən başlayaraq seçkilərin keçirilməsi gününə 10 gün qalanadək MSK-ya müraciət olunmalıdır.

Bundan başqa, qeydə alınmış namizədin MSK-ya ikinci ilkin maliyyə hesabatının təqdim edilməsi müddəti də sabah başa çatır.