Allahşükür Paşazadəyə orden verildi - Rusiyada

22.10.2015 15:14 Sosreaksiya 1782

Qafqaz Müsəlmanları İdarəsinin (QMİ) sədri Şeyxülislam Allahşükür Paşazadə oktyabrın 22-də Rusiya Federasiyası Başqırdıstan Respublikasının paytaxtı Ufa şəhərində keçirilən “XXI əsr təhsil müstəvisində İslamın idealları və dəyərləri” mövzusunda VIII Beynəlxalq elmi-praktik Konfransın işində iştirak edib.

Reaksiya.az APA-ya istinadən xəbər verir ki, bu barədə məlumat QMİ-nin mətbuat xidmətindən verilib.

Məlumata görə, konfransın gedişində QMİ sədri A. Paşazadənin Rusiya Mərkəzi Ruhani İdarəsinin ali mükafatı – “Əl-İzzət — Şərəf, Şöhrət və Ləyaqət” ordeni ilə təltif olunduğu barədə fərman elan edilib. Orden QMİ sədri, MDB Dinlərarası Şurasının həmsədri Şeyxülislam Allahşükür Paşazadəyə “İslam dininə uzunmüddətli etibarlı xidmətinə, dünya miqyasında sülh və həmrəyliyin ardıcıl müdafiəsi işində uğurlarına, dünya xalqları, Rusiya və Azərbaycan arasında dostluq və qarşılıqlı anlaşmanın möhkəmləndirilməsinə layiqli töhfəsinə, millətlərarası və dinlərarası dialoq işinə hərtərəfli dəstəyinə, insanların dünyanın taleyinə görə Yaradan, Vətən, gələcək nəsillər qarşısında məsuliyyət daşıdıqları hissini aşıladığına görə” təqdim edilib.

Ordeni və xüsusi hədiyyəni QMİ sədrinə Rusiya Mərkəzi Ruhani İdarəsinin sədri Baş Müfti Talqat Tacuddin təqdim edib. Şeyxülislam A.Paşazadə tədbirdə məruzə ilə çıxış edib.

Ufa şəhərində Beynəlxalq Konfrans öz işini 23 oktyabr tarixində davam etdirəcək.