Bahar Muradova Vaqif Bəhmənlini təbrik etdi

23.10.2015 16:05     Sosreaksiya     2127

Azərbaycan Respublikası Milli Məclisi Sədrinin müavini, Siyasi elmlər üzrə fəlsəfə doktoru Bahar Muradova şair, tərcüməçi, Azərbaycan Yazıçılar Birliyinin İdarə heyətinin üzvü Vaqif Bəhmənlini 60 illik yubileyi münasibəti ilə təbrik edib.

Şeiri özünə Vətən sayan şair - VAQİF BƏHMƏNLİ

Azərbaycan ictimaiyyəti onu ilk növbədə “bizlərə”, “onlara”, “hamıya” xitabən ünvanladığı səmimiyyət dolu şerləri ilə seçilən, çağdaş poeziya aləminin görkəmli nümayəndəsi kimi tanıyır. O, Qarabağ ruhunu, havasını, nəfəsini yazılarına hopdurmuş və mükəmməl yaradıcılıq qabiliyyətinə malik bir şeir-sənət ustası kimi sözün qüdrət zirvəsini fəth edənlərdəndir. Əsərlərində ana dilimizə həssaslıqla yanaşaraq “sözün də bir nemət olduğunu” çoxsaylı oxucularına anlatmağa nail olub.

Onun müdrik kəlamlarla zəngin şeirləri, halalı haramdan ayıran publisistik yazıları, radioda eşidilən səsi, televiziya ekranlarından boylanan nurlu siması həyatın mənasını dərk etməyə çalışan hər kəsin düşüncə yoluna bir işıq salır. Çünki bir çoxları onu hələ uşaqlıq illərindən bəri həyatın sərt sınaqlarına mətinliklə sinə gərərək sınmayan və həmişə qamətini dik tutan, öz zəhməti və əməksevərliyi sayəsində insanlıq zirvəsinə ucalmış bir şəxsiyyət kimi tanıyır. Əsərlərini oxuduqca həssas və kövrək ruhlu poeziya nümunələrində qayğıkeşlik və doğmalıqla yanaşı tərbiyəvi və maarifləndirici yanaşmanın şahidi oluruq.

Öz qələminə xitabən “Özünə ayrı yol ara” söyləyən Vaqif Bəhmənli şeir-sənət aləmində özünəməxsusluğu ilə seçilən bir poetik üslub formalaşdıra bilib. Şeiri özünə Vətən sayan şairin ədəbiyyata və yaradıcılığa bağlılıq hissi bütün yazılarında öz əksini tapır. Məncə onu bir çoxlarından fərqləndirən əsas xüsusiyyətlərdən biri də təkcə özü üçün deyil, həm də hamı üçün yazmasıdır.

Bu illər ərzində 35-dən çox kitabı işıq üzü görüb. Azərbaycan Yazıçılar Birliyinin, Azərbaycan Jurnalistlər Birliyinin və Avrasiya Yazarlar Birliyinin üzvüdür. Əsərlərinin bir çoxu müxtəlif dillərə tərcümə olunmuş və ölkə hüdudlarından çox-çox uzaqlara adlamışdır. Azərbaycan Respublikasının Əməkdar Mədəniyyət işçisi fəxri adına, bir sıra nüfuzlu mükafatlara layiq görülməsi isə yaradıcılığına verilən qiymətin göstəricisidir.

Vaqif Bəhmənli həm də hər zaman fəal vətəndaşlıq mövqeyində dayanaraq respublikamızda gedən mühüm ictimai-siyasi proseslərə biganə qalmamaqla ölkə rəhbərliyinin apardığı siyasi kursun təşəkkül tapması üçün öz səy və bacarığını əsirgəməyənlərdəndir.

“Azərbaycan fotoalbomu”nu, “Azərbaycan Dövlət Kitabı”nı onun təqdim etdiyi mətnlər müşayiət edir. “Heydər Əliyev adına” əsəri bu adın əbədiləşdirilməsi istiqamətində həyata keçirilən siyasi kursa sədaqətin nümunəsidir. “Vətənin İlhamı – ömürdən reportaj” əsəri isə ölkə rəhbərinin mədəniyyətin inkişafına yönəlik fəaliyyətinə münasibəti yeni baxışlarla zənginləşdirir.

İşgüzar bir insan kimi müxtəlif zamanlarda mətbu orqanlarda rəhbər vəzifələrdə və dövlət orqanlarında çalışarkən yaradıcılıqla yanaşı yüksək təşkilatçılıq qabiliyyəti nümayiş etdirmiş və bu gün də çox əhəmiyyətli dövlət qulluğu vəzifəsinin öhdəsindən layiqincə gəlməkdədir.

Hamı kimi mən də onu saf, təmiz qəlbli, təvazökar insan, etibarlı dost, gözəl ailə başçısı, ziyalılar və söz-sənət adamları arasında böyük nüfuz sahibi kimi tanıyıram.

Bunun bariz nümunəsini isə bir daha oktyabrın 22-də Gənc Tamaşaçılar Teatrında şairin 60 illik yubileyinə həsr olunmuş “Beş damla” adlı poeziya və musiqi axşamında iştirak edərkən gördüm.  Gördüm və əmin oldum ki, “Söz” adlı Qüdrət nərdivanının pillələrində özünün təbirincə desəm qocala-qocala ucalan Vaqif şeiri yenə də əvvəlki tək gənc və müasirdir.

İnsan qəlbinə yaxın və zərif, təfəkkürləri silkələyəcək qədər həqiqi və şərtdir.

Bir sözlə, həyatın özü kimi aydın və realdır.

Çox hörmətli Vaqif müəllim Sizi 60 ilin zirvəsini və poeziya həvəskarlarının qəlbini fəth etdiyinizə görə təbrik edir, xeyirxahlıq, nəciblik, vətənpərvərlik duyğuları aşılayan yaradıcılığınızı bundan sonra da daha uğurla davam etdirməyinizi arzulayıram.

Qoy bundan sonra da uzun illər boyu ilhamınız və qələminiz həm sənətin, həm də dilimizin saflığının keşiyində ayıq-sayıq dayansın.

Tanrı Sizi qorusun!