“Baku Cup”: Finala yüksələn idmançılar bəlli oldu

27.07.2015 05:39     Sport reaksiya     1798

Bakıda Bakı Tennis Akademiyasında “WTA international” seriyalı ənənəvi beynəlxalq tennis turniri davam edir.

Reaksiya.az xəbər verir ki, 250 min ABŞ dolları uduş fondu olan turnirdə iyirmiyə yaxın ölkədən dünyanın tanınmış tennisçiləri iştirak edirlər. Bu il güclü tennisçilərin iştirak etdiyi turnir gərgin və maraqlı idman mübarizəsi şəraitində keçir.

Dünən turnirdə daha altı qarşılaşma keçirilib.

Turnirdə İtaliya təmsilçisi Nastassja Burnett ukraynalı Elizaveta Yançuku üç setin sonunda 7-5, 5-7, 6-3 hesabı ilə gərgin mübarizədə məğlub edə bilib. N.Burnett təsnifat mərhələsinin final raundunda Niqina Abdurrahimova (Özbəkistan) ilə üz-üzə gələcək.

Türkiyəni təmsil edən İpək Soylu da təsnifat mərhələsinin finalına yüksəlib. O, rəqibi çexiyalı tennisçi Eva Hrdinova üzərində 6-1, 6-1 hesabı ilə qələbə qazanıb. İ.Soylunun final raundunda rəqibi Olqa Yançuk (Ukrayna) olacaq.

Ukraynalı tennisçi Olqa Fridman 6-4, 6-0 hesabı ilə Çexiya təmsilçisi Katerina Vankovaya məğlub olub. Təsnifat mərhələsinin finalına adlayan çexiyalı idmançı bu raunda Çin təmsilçisi Zhaoxuan Yang ilə mübarizə aparacaq.

Rusiya təmsilçilərinin mübarizəsində daha təcrübəli Valentina İvaxnenko qalib ayrılıb. O, həmyerlisi Polina Monovanı 6-3, 6-3 hesabı ilə məğlub edib. V.İvaxnenko təsnifatın finalında Valentina Hiroko Kuwata (Yaponiya) ilə üzləşəcək.

Gürcüstan idmançısı Oksana Kalaşnikova da təsnifatın final raundunda mübarizə aparmaq imkanı ələ edib. O, Avstriya təmsilçisi Patrisia Mayr-Açleitneri üç setin nəticəsində (2-6, 6-3, 6-2) məğlub edib. O.Kalaşnikova final raundunda rumıniyalı tennisçi Patrisia Maria Tiqlə görüşəcək.

Ukraynalı Olqa Savçuk rusiyalı idmançı Anna Morginayla matçda 6-0, 6-0 hesabı ilə üstün olaraq təsnifat mərhələsinin final raunduna yüksəlib. Ukrayna idmançısı növbəti raundda həmyerlisi Yuliya Beygelzimerlə qarşılaşacaq.

Daha əvvəlki görüşlərdə Özbəkistan təmsilçisi Niqina Abdurrahimova və ukraynalı tennisçi Olqa Yançuk təsnifat mərhələsinin final raunduna adlamışdı.

Bu gün əsas turnir hissəsinin oyunları və təsnifat mərhələsinin final görüşləri keçiriləcək.

Ölkəmizdə beşinci dəfə keçirilən bu beynəlxalq turnir avqustun 2-dək davam edəcək.