CNN "Bakı 2015"-dən yazdı - FOTO

04.06.2015 11:57     Sport reaksiya     1041

CNN telekanalının internet səhifəsində iyunun 12-28-də Bakıda keçiriləcək birinci Avropa Oyunları ilə bağlı məqalə yayılıb. Məqalənin müəllifi Kris Borq Avropa Oyunlarının əhəmiyyətindən bəhs edir, Azərbaycan, xüsusilə Bakı şəhəri haqqında məlumat verir.

Məqalədə bildirilir ki, Avropa Oyunlarında 50 ölkədən 6 mindən çox atlet bir araya gələcək. 2012-ci ilin dekabrında Avropa Olimpiya Komitəsinin (AOK) Roma şəhərində keçirilən Baş Assambleyasında dörd ildən bir təşkil ediləcək Avropa Oyunlarının birincisinin məhz Bakıda keçirilməsi ilə bağlı qərar qəbul edilib. Beləliklə, 1951-ci ildən keçirilən Asiya və Panamerika Oyunları ilə yanaşı, artıq Avropada da multi-idman turniri təşkil ediləcək. Avropa Oyunlarında 50 milli olimpiya komitəsinin təmsilçiləri medallar uğrunda mübarizə aparacaqlar. İyunun 12-də Oyunların açılış, 28-də isə bağlanış mərasimləri keçiriləcək. AOK bəyan edir ki, bu yarış Olimpiya Oyunlarının təkrarı olmayacaq, idman dəyərlərinin cazibəsini daha da artırmaq üçün bir vasitəyə çevriləcək.