“Neftçi” klubu Haiti millisinin üzvünü heyətinə cəlb edib

28.03.2018 12:40     Sport reaksiya     1384

Bakının “Neftçi” klubu 2018-2019-cu il mövsümünün transfer hazırlığına başlayaraq heyətinə yeni futbolçu cəlb edib.

Reaksiya.az xəbər verir ki, Haiti milli komandasının 28 yaşlı yarımmüdafiəçisi Soni Mustivar ilə növbəti mövsümün sonunadək müqavilə imzalanıb.

Fransada dünyaya gələn Mustivar bu ölkənin 20 yaşadək futbolçulardan ibarət yığmasında, “Bastiya” və “Orlean” klublarında çıxış edib. Rumıniyanın “Petrolul” və ABŞ-ın “Sportinq Kanzas Siti” klublarında legioner həyatı yaşayıb. O, “Petrolul”la Rumıniya kubokunun, "Sportinq Kanzas Siti” ilə isə ABŞ açıq kubokunun qalibi olub.

Qeyd edək ki, Mustivar Liqa 1-də çıxış edən “Petrolul”un heyətində 94, MLS təmsilçisi olan sonuncu klubu “Sportinq Kanzas Siti”də isə 76 oyun keçirib.