“Qarabağ”ın ən çətin dönəmi

01.11.2018 13:42     Sport reaksiya     1203

Heç şübhəsiz ki, “Qarabağ” özünün çətin günlərini yaşayır. Komanda düşdüyü durumdan çıxış yolları arasa da, sanki hansısa burulğan onu özünə tərəf çəkir.

Ötən gün “Qarabağ” çempionatın autsayderlərindən olan, məhz zəif çıxışına görə serb baş məşqçisi ilə yollarını ayıran “Keşlə” ilə qarşılaşdı.

Həmin gün həm də “Qarabağ”ın ötən mövsüm çıxış etdiyi UEFA Çempionlar Liqasında “Atletiko” üzərində qazandığı qələbəyə bərabər sərfəli heç-heçənin qeydə alındığı gün idi. Yəni Miçelin Madriddə başla qol vurub “Qarabağ”ın tarix yazdığı gündən düz bir il keçirdi.

 

Həmin gün “Qarabağ” çox öyülmüşdü. Şəninə haqlı olaraq təriflər deyilirdi. Lakin bu gün vəziyyət başqadır. Komandanın taktiki-texniki yox, məhz psixoloji aspektdə rəqiblərindən geri qaldığını artıq əvvəlki yazımla çatdırmağa çalışmışdım.

Ancaq “Keşlə” ilə oyun göstərdi ki, vəziyyət düzəlməyib. Düzdür, yenə düz bir il əvvəl olduğu kimi Miçel qol oldu, yenə “Qarabağ” səfərdə uduzmadı. Ancaq “Arsenal”, “Səbail”, “Vorskla” və “Neftçi” ilə oyunlara bu matç da qələbəsiz oyunlar seriyası kimi yazıldı.

Artıq “Qarabağ”ı lider “Neftçi”dən beş xal ayırır. Bu, Ağdam təmsilçisi üçün ciddi siqnaldır. Qurban Qurbanovun gəlişindən sonra komandanın ən ağır dönəmidir. Qeyd etdiyim kimi, “Qarabağ” ardıcıl beş oyundur qələbə qazana bilmir.

Düzəldin, “Vorskla” ilə oyun öncəsi bu ab-havanı düzəldin... Hamı sizdən bunu gözləyir. “Köhlən atlar”ın yenidən şaha qalxmasını...

Reaksiya.az

Şərhlər