Futbolçu silahlı hücuma məruz qalıb

12.08.2015 00:58     Sport reaksiya     1889

Türkiyə yığmasının və “Fənərbaxça”nın yarımmüdafiəçisi Mehmet Topal şok hadisə ilə üzləşib. Reaksiya.az-ın Türkiyə mətbuatına istinadən məlumatına görə, 29 yaşlı futbolçuya atəş açılıb.

Xəbərdə bildirilir ki, Topal bu gün məşqdən çıxıb evə gedərkən bir avtomobil tərəfindən izlənilib. Samandra yaxınlığında futbolçu maşınını saxlayınca, ona tərəf 3 dəfə atəş açılıb. Xoşbəxtlikdən futbolçunun avtomobilinin şüşələri gülləkeçirməz olub və Mehmet heç bir xəsarət almayıb. Yerli polis oyunçunun ifadəsini aldıqdan sonra məsələ ilə bağlı geniş araşdırma aparmağa başlayıb.

Qeyd edək ki, bu ilin aprel ayında da “Fənərbaxça”nın avtobusuna Rizədə atəş açılmış, sürücü yüngül xəsarət almışdı.